Vetëm pak muaj pasi u bë nënë për herë të parë, Vesa Vllasaliu po tërheq vëmendjen e ndjekësve me transformimin e saj fizik. Partnerja e futbollistit Mirlind Daku ndau në rrjetet sociale rrugëtimin e saj të rikthimit në formë, duke treguar se nga 115 kilogramë ka arritur të zbresë në 90 kilogramë, një ndryshim që ka ngjallur menjëherë kureshtje dhe komente nga publiku.
Në një seri postimesh në InstaStory, Vesa ka sqaruar se ndryshimi nuk lidhet me dieta ekstreme apo suplemente dobësimi, por me disa zgjedhje të thjeshta ushqimore dhe stil jete. “Në fillim kom marrë plot mesazhe hate, e tash papritmas: ‘Qysh je dobësu?’”, shkroi ajo me humor, përpara se të tregonte se vuan nga intoleranca ndaj glutenit dhe laktozës, çka e ka shtyrë të heqë nga dieta produkte si pitet, flia apo ushqime të tjera me gluten. “Nuk pi ma cola edhe nuk ha ëmbëlsina”, shtoi ajo, duke theksuar se shmang edhe çdo lloj medikamenti dobësimi, pasi është e vetëdijshme se një pjesë e tyre mund të kalojnë te foshnja përmes qumështit të gjirit.
Sipas Vesës, sekreti i vërtetë i këtij ndryshimi mbetet një kombinim i ushqimit të kujdesshëm dhe pushimit. “Edhe gjaja ma e rëndësishme: gjumi! Fle pothuajse gjithmonë kur fle edhe e vogla jem”, shkroi ajo, duke treguar se përpiqet të ruajë energjinë dhe ekuilibrin gjatë periudhës së mëmësisë. Një rrëfim i thjeshtë dhe realist që, sipas shumë ndjekësve, po shërben si frymëzim për nënat e reja që kërkojnë të kujdesen për veten pa rrezikuar shëndetin e fëmijës.
