Në tapetin e kuq të festës së “Sports Illustrated”, para Super Bowl 2026, një moment i vetëm mjaftoi për të kthyer vëmendjen globale nga sporti tek dashuria.
Angela Martini, ish-Miss Universe Albania dhe një nga figurat më magnetike të diasporës shqiptare në SHBA, u shfaq e buzëqeshur, me një fustan jeshil të thellë dhe një unazë diamanti që reflektonte dritat e kamerave por mbi të gjitha, një mesazh të qartë, kapitulli i saj martesor nuk ka përfunduar.
Vetëm pak muaj më parë, Martini kishte depozituar kërkesë për divorc nga bashkëshorti i saj prej shtatë vitesh, Drago Sulewski, duke përmendur “mospërputhje të pakapërcyeshme”. Por në një kthesë që as Hollywood-i nuk do ta shkruante më dramatike, modelja konfirmoi se ata kanë “rindezur shkëndijën” dhe se dokumentet e divorcit janë tërhequr.
E pyetur për Ditën e Shën Valentinit, Martini ofroi një deklaratë që pushtoi titujt:
“Djemtë i duan vajzat e çmendura.”
Një frazë provokuese, e thënë me buzëqeshje dhe vetëbesim, që në fakt përkthen filozofinë e saj për pasionin dhe spontanitetin në marrëdhënie. Në vend të një rrëfimi viktimizues pas krizës, ajo zgjodhi narrativën e rikthimit.
Në imazhet e publikuara, Angela nuk fsheh asgjë. Unaza gjigande ekspozohet me krenari para kamerave, ndërsa qëndrimi i saj është i qetë, i sigurt, pothuajse sfidues. Një grua që ka kaluar një krizë publike dhe që vendos ta përmbysë atë në një histori rilindjeje.
Në një kohë ku ndarjet shpallen me një postim dhe pajtimet rrallë mbijetojnë, historia e saj është një rikujtesë se disa lidhje nuk mbyllen me një dokument ligjor. A është kjo një ribashkim i përhershëm apo një kapitull i dytë me sfida të reja? Për momentin, Angela Martini duket e vendosur ta jetojë me intensitet dhe ta tregojë me stil.
