Robert De Niro ka folur për herë të parë publikisht pas rrëfimit të vajzës së tij, Airyn, e cila u deklarua transgjinore në një intervistë për revistën Them, të martën më 29 prill.
“E kam dashur dhe mbështetur Aaron-in si djalin tim, dhe tani e dua dhe mbështes Airyn-in si vajzën time. Nuk e kuptoj pse bëhet kaq zhurmë,” tha aktori i njohur për People. Airyn, sot 29 vjeçe, është një nga shtatë fëmijët e De Niros dhe binjake me Julian, nga lidhja e tij me aktoren Toukie Smith.
Në intervistën e saj, Airyn foli për rrugëtimin personal, duke përshkruar se si ishte të rritej mes ndjesisë së mospërputhjes dhe presioneve të jashtme për të qenë dikush që nuk ishte.
“Gjithmonë më thoshin që isha ose shumë, ose jo mjaftueshëm për diçka: shumë e madhe, jo mjaftueshëm e dobët. Jo mjaftueshëm e zezë, jo mjaftueshëm e bardhë. Shumë femërore, jo mjaftueshëm mashkullore,” rrëfeu ajo. “Asnjëherë nuk më thanë thjesht: ‘Je tamam ashtu siç je.’”
Që nga nëntori i kaluar, ajo ka nisur terapinë hormonale dhe është angazhuar për të qenë një zë për ata që ndihen të padukshëm në shoqëri. Airyn theksoi se dëshiron të jetë shembull për të tjerë që ndihen të përjashtuar nga modelet tradicionale.
“Do të doja të isha frymëzim të paktën për një person si unë — që është i zi, queer, me trup më të madh, dhe që nuk përputhet me imazhin e modeles klasike,” tha ajo.
Krahas aktivizmit, ajo po ndjek studimet për t’u bërë këshilluese e shëndetit mendor, me fokus te komuniteti LGBTQ+ dhe njerëzit me ngjyrë.
Për ata që e kritikojnë si “nepo baby”, Airyn përgjigjet me bindje:
“Babai gjithmonë na ka nxitur të ndjekim rrugën tonë. Dua që çdo sukses i imi të vijë nga meritat e mia.”
Robert De Niro është baba i shtatë fëmijëve: Drena (53) dhe Raphael (48) me ish-bashkëshorten Diahnne Abbott; Julian dhe Airyn (29) me Toukie Smith; Elliot (27) dhe Helen Grace (13) me ish-gruan Grace Hightower; dhe vogëlushja Gia, 2 vjeçe, me partneren aktuale Tiffany Chen.
