Luana Vjollca është gati për një tjetër finale të madhe, këtë herë në “Ferma VIP”. Por, emocionet që e shoqërojnë nuk janë ato të zakonshmet që ndodhin në fillim të një aventure; janë emocionet e një udhëtimi që po përmbyllet me ndjesinë e arritjes dhe gëzimit. Në një intervistë të fundit për Living ajo ka ndarë disa nga sfidat që e kanë shoqëruar vitet e fundit.
“Unë zgjedh gjithmonë t’ia nis nga e para,” thotë Luana, duke treguar se ndonëse kishte disa projekte në tavolinë, asnjëri prej tyre nuk i jepte atë ndjesinë e sfidës dhe frymëzimit. Ajo e kupton menjëherë kur diçka ia vlen, dhe kështu ndodhi edhe me “Fermën”. “Kur m’u bë propozimi mendova menjëherë se ishte oferta e duhur në atë moment… kjo ishte sfida e re që po kërkoja prej kohësh.”
Luana ka qenë gjithmonë e lidhur me ekranin. Ajo e nisi karrierën në moshë shumë të re dhe që në fillimet e saj, vendosmëria dhe ambicia ishin të dukshme. Rreth 17 vite më parë, si 16-vjeçare, ajo dha intervistën e parë për gazetën “Intervista” dhe pozoi për kopertinën. Që atëherë nisi ngjitja e saj drejt një karriere të suksesshme si moderatore dhe autore në programet më të ndjekura në prime time.
“Ferma VIP” është ndalesa e radhës në këtë rrugëtim. Jo vetëm një tjetër sfidë, por edhe një eksperiment personal që i ka sjellë kënaqësi dhe rritje. “Ishte pikërisht momenti për t’u sprovuar në një format tjetër televiziv,” tregon ajo. Për të, fillimi nga e para është më shumë se një vendim; është një mënyrë për të mos qëndruar në vend, për të eksploruar dhe për t’u rritur, qoftë profesionalisht apo në jetën personale.
“Njeriu e kupton kur një stad i caktuar i jetës është ezauruar dhe nuk mund të shkojë më tej. E në kësi rastesh, unë zgjedh gjithmonë t’ia nis nga e para,” shton ajo.
Dhe nëse ky fillim është i pasigurt, Luana ka një mesazh që frymëzon: “Sido që të shkojë, dalim të fituar: nëse ndryshimi del për mirë, rritemi, nëse dështojmë, prapë fitojmë, sepse mësojmë nga gabimet dhe pa gabime nuk zhvillohemi dot.”
