Dantellat, lidhëset, bishti i gjatë i fustanit dhe mëngët e gjata janë disa nga elementët që të vijnë menjëherë në mendje kur flitet për një fustan dasme të veshur nga një nuse e Pallatit Mbretëror. Çuditërisht ky stil është trashëguar ndër vite tek të gjitha nuset e mbretërisë. Fustani më origjinal dhe që përcaktoi trendin e fustaneve mbretërore ishte ai i Mbretëreshës Viktoria, në dasmën e saj me Princin Albert në vitin 1840. Viktoria ishte e para që zgjodhi të vishte një fustan të bardhë me dantellë, sepse ngjyra e bardhë nuk ishte shumë popullore për nuset në atë kohë. Vendimi i Mbretëreshës Viktoria ishte jo vetëm një zgjedhje politike por edhe stilistike dhe bëri të fillonte epoka e re e fustaneve të nusërisë.
Më pas gjurmët e saj i ndoqi dhe Mbretëreshë Elizabeta II, fustani i së cilës në vitin 1947 shërbeu si një shmangie nga vështirësitë ekonomike me të cilën të gjithë anglezët po përballeshin pas Luftës së Dytë Botërore. Megjithatë për fustanin e saj u zgjodh një material mëndafshi i zbukuruar me 10.000 perla. Dizajneri i fustanit u frymëzua nga piktura e Botticellit ‘Primavera’, që kishte kuptimin e ‘rilindjes dhe ringritjes’ pas luftës.
Ndërsa fustani i Princeshë Dianës në vitin 1981 ka ngjallur më shumë reagime tek të gjithë. Fustani i saj prej mëndafshi dhe me mëngët e fryra vendosi trendin për një dekadë të tërë.
Por me kalimin e viteve ky stil i Princeshës Dianës u zbeh dhe në vitin 2011 Kate Middleton zgjodhi një fustan me strukturë më moderne. Fustani i saj ishte prej material sateni dhe mbrapa kishte një gjatësi prej tre metrash dhe kishte të punuar me dorë disa lule trëndafili, zambakë dhe tërfil.
Ndërkohë shumë pak dihet për fustanin që do të veshë Meghan Markle në dasmën e saj në 19 maj, megjithatë ajo do të jetë e detyruar të ndjekë protokollin mbretëror. /revistawho.com
Burimi: Enews
