Rastësia është mbreti i botës. Por shpesh kjo rastësi ushqyer me ëndrra, pasion dhe punë bëhet më e kontrollueshme, më e plotë dhe një rrugë që të ndjek gjithë jetën. Kështu e ka nisur rrugën e tij drejt televizionit edhe Argjendi, djali simpatik që sot drejton një prej emisioneve më të mira të mëngjesit në Kosovë. Gjithçka nisi teksa, Argjend Rraci përgatitej për projektin e tij inovativ në stilin e “Podcast” me rrëfime, përjetime, përvojë, art, biznes, sport, modë. 14 janari shënjoi emisionin e parë për të çelur një sipar ëndrrash.
Por nuk përfundoi aty. Një ofertë nga “KTV” duket se e ndryshoi rrjedhën e gjithçkaje. Kështu, prej 25 janarit Argjendi u ul në një kolltuk që të dhuron një përvojë ndryshe, të papërshkrueshme, të veçantë. Krah moderatores Agnesa Vitija, në “Koha Televizion” troket në mëngjeset plot energji. Një rrugë e saposhtruar, por e sigurt, e matur, e vendosur për të qenë gjatë në qarkullim. Koha i rrëfen të gjitha, e ndoshta një ditë Argjendin siç thotë dhe vetë ai, do ta shohim në skenën e “Festivalit të Këngës”, për të realizuar ëndrrën, për të vazhduar rrugën dhe për të ushqyer pasionin.