Disa momente në jetë shkruhen me shkronja të mëdha. Ashtu si 19 nëntori 2025 u shkrua për shefin nga Kosova, Emin Neziri. Ai është nderuar me yllin e parë “Michelin”. Ceremonia u zhvillua në Parma, ku shefi shqiptar u ngjit në skenë për të marrë nderimin që simbolizon ekselencën kulinare në nivel ndërkombëtar.
“19 Nëntor 2025.
Një ditë që do ta mbaj në zemër përgjithmonë!
Sot, në atë skenë në Parma, mora yllin tim të parë Michelin. Drita e parë zyrtare në një rrugëtim të gjatë, të lodhshëm, të bërë me ëndrra, sakrifica, djersë dhe dashuri absolute për kuzhinën.
Kush më njeh e di nga kam nisur. E di sa shumë sakrifica kam bërë. Sa net pa gjumë, sa dreka të humbura, sa herë kam lënë mënjanë jetën time personale për atë profesionale. Kuzhina më ka kërkuar gjithçka. Dhe unë i kam dhënë gjithçka!
Pa favorizime, pa rrugë të shkurtra”, ka shkruar Haziri në një postim në “Instagram” krahas lajmit të bukur.
Ylli i parë “Michelin” e vendos atë mes emrave më të rëndësishëm të gastronomisë botërore dhe hap një kapitull të ri në karrierën e tij.
Kujtojmë se një vit më parë, ai u vlerësua nga revista “Forbes” si kuzhinieri më i mirë nën moshën 30 vjeç. Në po të njëjtën kohë, “Corriere della Sera” i kushtoi një shkrim, ku Emini rrëfente historinë e jetës së tij, nga “arratisja” nga Kosova, te jeta në Itali.
“Tri ditë e tre netë në makinë, duke ecur në pyll. Në duart e kalimtarëve, tragetet e emigrantëve të paligjshëm. Ne u larguam pa asgjë, duke i lënë gjyshërit tanë në Prishtinë. Sapo mbërritëm në Trieste, taksisti na zbriti në qendër. Po binte borë , ndjeva të ftohtin në kocka. Ishte një mbrëmje nëntor i vitit 2002, unë isha shtatë vjeç. Natën e parë fjetëm nën shkallë, të nesërmen në mëngjes shkuam në komisariat, duke kërkuar statusin e refugjatit. Babi Xhelil kishte punuar si kamarier në Gjermani, por ishte kthyer në Kosovë gjatë luftës. Nëna Hajrije është shtëpiake. Ata donin të na ofronin një të ardhme më të mirë. Nuk kam vese, punoj gjithmonë. Fillova nga e para dhe më në fund arrita të blej shtëpinë e prindërve të mi. Ndërkohë vëllai im Erioni ka kryer studimet për mjekësi, ndaj do të kemi edhe një mjek në familje”.
Emini nuk u bë doktor, ashtu si donte e ëma, por sot ka një yll “Michelin” në emrin e tij dhe një restorant në mes të Milanos.
