Chiara Ferragni ka shënuar rikthimin e saj në skenën ndërkombëtare të modës, duke u prezantuar si fytyra e re e Guess për sezonin pranverë 2026. Ky bashkëpunim konsiderohet angazhimi i saj i parë i madh publik pas mbylljes përfundimtare të çështjes ligjore që e shoqëroi për dy vite me radhë.
Paul Marciano, bashkëthemelues dhe Drejtor Kreativ i Guess, u shpreh se zgjedhja e Ferragnit ishte e natyrshme për brandin: “Që në fillim ndjemë një lidhje të fortë me Chiaran. Energjia, vetëbesimi dhe qëndrimi i saj përfaqësojnë në mënyrë të përkryer shpirtin e Guess. Ajo mishëron figurën e një gruaje që beson në veten e saj dhe ecën përpara me vendosmëri.”
Pas një periudhe të gjatë heshtjeje dhe presioni të madh publik, Ferragni ka folur për herë të parë pas vendimit të gjykatës. Vetëm pak ditë pasi u shpall e pafajshme në çështjen gjyqësore për mashtrim të rënduar, e lidhur me fushatat “Pandoro Balocco Pink Christmas” dhe “Uova di Pasqua”, sipërmarrësja italiane ka ndarë për mediat vendase një rrëfim të sinqertë për periudhën që e cilëson si ndër më të vështirat e jetës së saj.
37-vjeçarja tregoi se vendimi i pafajësisë i ka rikthyer qetësinë që i kishte munguar që prej vitit 2022. Ajo zbuloi se momentin e mori me shumë thjeshtësi, duke e festuar në shtëpi, pranë njerëzve më të afërt.
