Aktori i humorit Akil Varfi, i njohur nga publiku për rolet e tij në “Portokalli”, ka ndarë një kapitull të errët nga jeta e tij, duke treguar për herë të parë vështirësitë ekstreme që ka përjetuar si emigrant në Gjermani.
I ftuar në emisionin “S’e Luan Topi”, Varfi tregoi se në moshën 16-vjeçare kishte ndërmarrë një udhëtim të vështirë drejt Gjermanisë, bashkë me familjen, në kërkim të një të ardhmeje më të mirë. Por realiteti ishte krejt ndryshe nga ëndrrat.
“Përfunduam në një kamp refugjatësh me kushte të tmerrshme. Nuk kishim asgjë. Për të mbijetuar, isha i detyruar të vidhja bukë. Shkoja në sportele të ndryshme, merrja bukën dhe e fshihja në çantë. Nuk flija natën, më zinte gjumi me frikë dhe ndihesha fajtor. Kisha me vete motrat, mamin dhe babin. Ata më kishin besuar dhe unë ndihesha përgjegjës për çdo vështirësi që po kalonim,” – rrëfeu ai me emocione të forta.
Pasi u kthye në Shqipëri, aktori provoi sërish të ndërtonte një jetë në Gjermani, këtë herë në moshën 21-vjeçare. Por për shkak të mosrespektimit të afateve ligjore për qëndrim, përfundoi në paraburgim.
“Katër ditët e para më izoluan në një dhomë të errët. Nuk e dija nëse do dilja gjallë. Babai nuk dinte ku isha, më kërkonte. Ishte periudha më e errët e jetës sime,” – kujton Varfi..
