Në një zhvillim të rëndësishëm për ruajtjen dhe promovimin e trashëgimisë kulturore shqiptare, rituali i Dollisë është shpallur zyrtarisht Vlerë Kombëtare e Trashëgimisë sonë Kulturore Jomateriale. Vendimi u mor në mbledhjen e fundit të Këshillit Kombëtar të Trashëgimisë Kulturore Jomateriale, duke e përfshirë këtë zakon të lashtë në listën e pasurive që duhet të ruhen dhe të transmetohen brez pas brezi.
Dollia shqiptare nuk është thjesht ngritja e një gote, por një ritual me përmasa të thella shpirtërore dhe shoqërore, që mishëron vlerat më të larta të mikpritjes, respektit dhe bashkimit familjar e shoqëror. Ajo zhvillohet në raste të veçanta dhe kremtime, ku përmes fjalëve të urta dhe urimeve të sinqerta, theksohet rëndësia e miqësisë dhe nderimit të mikut.
Një element i veçantë i këtij rituali është figura e dollibashit, që ka rolin e udhëheqësit të sofrës dhe të përçuesit të mesazheve të dollisë, gjithmonë në bashkëveprim me pritësin. Kjo marrëdhënie ndërtohet mbi respektin reciprok dhe përfaqëson një kod moral e etik të rrënjosur thellë në traditën shqiptare.
Përfshirja e dollisë në listën e pasurive kombëtare jomateriale është një hap domethënës për njohjen dhe ruajtjen e trashëgimisë shpirtërore shqiptare, duke e konsideruar atë si pjesë të identitetit dhe krenarisë sonë kombëtare. Ky vendim i hap rrugë më tej dokumentimit, promovimit dhe edukimit të brezave të rinj mbi rëndësinë e kësaj tradite unike.
