Ngushtohen diferencat në sondazhe, Clinton e Trump akuza personale

Teksa numërimi ka nisur mbrapsht deri në ditën e zgjedhjeve, Donald Trump dhe Hillary Clinton, dy kandidatët që po ndjekin këmba këmbës njëri­-tjetrin në sondazhe sa i takon përparësisë, po
ripërtërijnë sulmet personale teksa diferenca sa vjen e ngushtohet në sondazhe. Clinton, e cila është përballur me një tkurrje në sondazhe ditët e fundit, shënjestroi sërish temperamentin e rivalit republikan dhe sjelljen e tij me gratë. Por Trump iu kundërvu duke thënë se ajo do të pasohet edhe në Shtëpinë e Bardhë nga hetimet penale. Ky i fundit ka fituar terren në krahasim me Clinton në disa shtete, tregojnë sondazhet e fundit, transmeton Panorama.
Fushata e së enjtes përfshiu edhe një dalje publike të rrallë nga gruaja e zotit Trump, Melania. Në fjalimin e saj të parë që nga Konventa e Republikanëve në muajin Korrik, ish­modelja foli për të qenin një emigrante dhe një nënë dhe tha se burri i saj do ta “bëjë Amerikën të ndershme”. Ajo gjithashtu u zotua, gjatë fjalimit të saj në periferi të Filadelfias, se do të udhëheqë një fushatë kundër ngacmimeve kibernetike nëse ajo bëhet zonja e parë, dhe se do të luftojë një kulturë që ka “marrë shumë kuptim dhe është bërë shumë e ashpër”. Anketat e fundit nga të dyja shtetet tregojnë se kandidatët kanë pothuajse të njëjtën mbështetje ndërsa i vjen fundi fushatës. Megjithatë duket se fushata e zotit Trump është favorizuar nga rritja e mbështetjes, duke mbyllur një hendek prej 4 për qind në Florida dhe tre për qind në Karolinën e Veriut, që nga fillimi i javës së kaluar, sipas përllogaritjes së një mesatareje të sondazheve të Real Clear Politics. Karolina e Veriut dhe Florida konsiderohen shtete të pavendosura, sepse ndryshe nga shtetet e tjera mund të votojnë ose për njërën parti ose tjetrën në zgjedhjet presidenciale. Për shembull, Karolina e Veriut votoi për zotin Obama në vitin 2008, por në vitin 2012 mbështeti Republikanin Mitt Romney. Florida votoi dy herë për republikanin, George W. Bush in 2000 dhe 2004 por votoi për zotin Obama në 2008 dhe 2012. Përfundimi i 2012­ës u përcaktua ga një diferencë prej vetëm 0.9 për qind. Një anketë e gazetës Uashington Post dhe e televizionit ABC tregon se mes votuesve të mundshëm në shkallë vendi, zonja Clinton ka 47 përqind mbështetje kundrejt 45 përqind për zotin Trump. Të mërkurën zoti Trump tha se një presidencë Clinton do të krijonte një krizë të stërgjatur dhe se çështja e emaileve do të shoqëronte gjithë presidencën e saj. Pasi Drejtori i FBI­së tha se po e rifillonte hetimin për email-et, zonja Clinton tha se autoritetet se autoritetet do të arrijnë të njëjtin përfundim si edhe në korrik, që nuk “ka çështje për t’u ndjekur penalisht”.