Në një kohë kur lajmet për tensione brenda familjes së famshme Beckham vazhdojnë të qarkullojnë në media dhe rrjetet sociale, Nicola Peltz Beckham ka zgjedhur të mos ushqejë dramën publike. Në një intervistë të publikuar për The Hollywood Reporter, aktorja 31-vjeçare shmangu me elegancë pyetjet rreth marrëdhënies mes bashkëshortit të saj Brooklyn Beckham dhe prindërve të tij, David dhe Victoria Beckham, duke theksuar se fokusi i saj këto javë ka qenë vetëm puna në projektin e ri filmik.
Duke folur për përkushtimin e saj me filmin Prima, Peltz Beckham u shpreh qartë: “Për dy javë e gjysmë kam qenë në dhomën e montazhit. Sinqerisht, nuk kemi pasur as fundjava. Thjesht kemi punuar për të përmbushur afatin”. Ajo shtoi se përqendrimi në projektin kreativ ka qenë një përvojë shumë pozitive për të, duke theksuar: “Ka qenë e mrekullueshme të fokusohem te kjo dhe të jem kreative. Ka qenë shumë argëtuese dhe mezi pres që filmi të dalë”.
Megjithatë, mes angazhimeve intensive profesionale, Nicola gjeti kohë edhe për një moment personal, festimin e ditëlindjes së 27-të të bashkëshortit të saj. Në një dedikim publik në rrjetet sociale, ajo e përshkroi Brooklyn si një nga njerëzit më të veçantë në jetën e saj, duke shkruar: “Shpresoj që të gjitha ëndrrat dhe dëshirat e tua të realizohen! Ti ndriçon çdo dhomë ku hyn dhe kushdo që të njeh të do shumë. Më pëlqen të jem gruaja jote”.
Ndërkohë, edhe prindërit e Brooklyn reaguan publikisht për ditëlindjen e tij, pavarësisht spekulimeve për tensione familjare. Victoria Beckham publikoi një mesazh të shkurtër në Instagram Story: “Gëzuar ditëlindjen, Brooklyn. Të duam shumë”. Edhe David Beckham ndau një foto të vjetër të djalit të tij duke shtuar: “Gëzuar ditëlindjen, Bust. Të duam”. Një gjest i thjeshtë, por domethënës, që sugjeron se pavarësisht zhurmës mediatike, familja Beckham vazhdon të ruajë një lidhje që publiku e ndjek gjithmonë me interes.
