Argjentina ka qenë dhe vazhdon të mbetet një nga vendet inspirim nga tradita, muzika, arti dhe kultura që mbart. Si asnjëherë më parë, traditat dhe kërcimet e këtij vendi do të mund t’i shohim së shpejti në Shqipëri, nëpërmjet 10 artistëve argjentinas që do përfaqësojnë vendin e tyre nëpërmjet performancave të tyre. Grupi Sangre Nativa-Argentina vjen për herë të parë në Shqipëri, për të sjellë kërcimet karakteristike argjentinase dhe vallet e tyre tradicionale në disa qytete të vendit tonë. Ardhja e këtyre artistëve është mundësuar nga ‘Open Festival on Tour’, një ide kjo që ka nisur nga dy persona që kanë lindur për të kërcyer, Enada Hoxha dhe Gerd Vaso në bashkëpunim me ‘Njerëz dhe ide’. Gjatë një konference për shtyp, Enada ka zbuluar disa detaje të tjera në lidhje me turneun që do të nisë në datë 7 të muajit qershor. “Argjentina ka folkun, ka muzikën, të cilën jo të gjithë kanë mundësinë ta njohin, ta kenë dëgjuar muzikën, ta kenë parë kërcimin e tyre. Kështu që kjo ishte ajo shtysa që më bëri mua për të patur Argjentinën në Shqipëri. Ajo çfarë më bëri përshtypje kur vizitova këtë vend të mrekullueshëm, janë njerëzit. Ata janë të lumtur dhe çdo gjë e shprehin me kërcim. Jam e lumtur, sepse kam 10 artistë që do të bëjnë vërtetë një performancë të shkëlqyer, që do ta bëjnë këtë ‘tour’ tepër të rëndësishëm dhe tepër të bukur”, është shprehur Enada. Ajo gjithashtu ka zbuluar se turneu do të nisë në datë 7 qershor, fillimisht në qytetin e Korçës. Tirana ndërkohë do jetë një nga stacionet e rëndësishme ku grupi i artistëve argjentinas do performojë së bashku me Enada Hoxhen dhe Gerd Vason per disa ditë radhazi në Teatrin ‘ArTurbina’ në datat 10, 11 dhe 12 Qershor. Për të vijuar më tej me qytetin e Fierit në datën 17 Qershor, Teatrin “Migjeni” në qytetin e Shkodrës në datën 19 dhe 20 Qershor, Teatri “Skampa” i qytetit të Elbasanit 21 Qershor, për ta mbyllur me qytetin e Vlorës në datë 27 Qershor në Lungomare./revistawho.com
