Këtë mbrëmje nis edicioni i dytë i talent show-t më të madh në Shqipëri, “Tu si que vales” në Vizion Plus. Patenta ndërkomëbtare që përzgjedh dhe bën të famshëm njerëzit e panjohur me talente të veçanta në të gjithë botën, që në edicionin e parë bëri bujë në vendin tonë për spektaklin dinamik që përcolli. E teksa në vendin fqinjë moderimi i është besuar Belen Rodriguez, këtu emri i prezantueses mbetet ende mister. Produksioni nuk ka dhënë detaje lidhur me perzonazhin femër që do të drejtojë këtë show, ndonëse kanë njoftuar për nisjen e tij dhe na kanë prezantuar edhe me anëtarët e jurisë. Sigurisht që më herët është bërë publik emri i moderatorit Florian Agalliu, aktor i njohur e i dashur për publikun, por flitet se ai nuk do të jetë vetëm, e një bukuroshe do e shoqërojë përgjatë gjithë sezonit në skenë. Nuk e dimë se për cilën vajzë do të ndizen prozhektorët, ndaj mbetet të presim hapjen e siparit sonte për ta zbuluar. Sakaq në jurinë që do të zgjedhë konkurrentët nuk ka shumë ndryshime. Emrave të mëdhenj të producentes Holta Dulaku, aktorit të madh Agron Llakaj, super këngëtares që ka rolin e zërit të publikut Vikena Kamenica, i është bashkuar sivjet edhe artisti e profesori Kastriot Caushi. Flitet se do të jetë një program që do të përcjellë shumë emocione por sigurisht që për këtë natë të parë kurioziteti më i madh mbetet tek prezantuesja.
