“Sfida” është programi më i ri që mban firmën e producentit të njohur Rezart Aga dhe që nis transmetimin sontë në orën 21:00 në kanalin T në Digitalb. Personazhe të njohur të skenës, ekranit dhe showbiz-it si Noizy, Çiljeta Xhilaga, Olti Curri, Rozana Radi, Klodiana Shala, Elgit Doda, Jonida Aliçkolli etj, do të jenë të veshur me kostum gri metalizato për t’i ruajtur disi VIP-at nga uji, i krijuar enkas për këtë program. Lojëra, përballje, argëtim, batuta, të qeshura dhe shumë adrenalinë premtohet çdo të shtunë në mbrëmje në këtë spektakël të veçantë televiziv. Ndryshe nga sa jemi mësuar t’i shohim deri më tani nëpër emisione të ndryshme televizive, personazhet publikë do të përballen ashpër në sfida ekstreme. Risia e këtij programi do të jetë edhe fakti që për herë të parë gazetarja sportive Ilda Bejleri do të shfaqet në një tjetër format, si prezantuese e një spektakli argëtues. Por ajo nuk do të jetë vetëm, pasi në krah do të ketë edhe Denard Xhillarin, i njohur nga të gjithë si Bobi, i cili është regjisor i njohur në Top Channel, por këtë herë do të shfaqet si moderator.
