Në këtë edicion të BBVK është komentuar shumë për vajzat dhe sa shpesh (apo jo dhe aq shpesh) ato bëjnë dush. Ndaj vendosëm të kërkojmë mendimin e ekspertëve dhe të zbulojmë se çfarë thonë ata për kujdesin e flokëve.
Nëse flokët tuaj yndyrosen më shpejt se të tjerët, nuk jeni vetëm kur ndjeni nevojën t’i lani çdo ditë. Por a është vërtet e nevojshme të përdorni shampo çdo ditë?
Dermatologia Dr. Heather W. Goff, profesoreshë në Departamentin e Dermatologjisë në UT Southwestern Medical Center, thotë se larja e tepërt mund të shkaktojë tharje, thyerje dhe majë të çara. “Flokët tanë përbëhen nga keratinë, një proteinë e fortë, por edhe ajo mund të thahet dhe të thyhet,” shpjegon ajo.
Sa shpesh duhet t’i lajmë flokët?
Faktoret që ndikojnë në frekuencën e larjes përfshijnë stërvitjen, përdorimin e produkteve të stilimit dhe natyrisht teksturën e flokëve.
- Flokët kaçurrela (ose të trashë dhe shumë të thatë): Këto kanë tendencë të thahen më shpejt dhe janë më të ndjeshme ndaj thyerjes. Dr. Goff sugjeron t’i lani maksimumi një herë në javë, ose ndonjëherë çdo dy javë.
- Flokët e hollë: Larja një herë çdo dy-tri ditë është më e përshtatshme. Larja më rrallë se një herë në javë mund të shkaktojë probleme të skalpit, si dermatitis seborrheic (kruajtje dhe zbokth).
A është e dëmshme larja çdo ditë?
Larja e përditshme mund të heqë vajrat natyralë që mbrojnë skalpin dhe të bëjë fundet e flokëve të thahen dhe të jenë më të brishtë. Dr. Goff e përshkruan kështu: “Nëse do të lani xhinset çdo ditë, ato me kalimin e kohës do të dëmtohen dhe do të duken të përdorura.”
Flokë yndyrorë një ditë pas larjes?
Shkak është shpesh gjenetika dhe hormonet androgen që stimulojnë gjëndrat e vajit. Për të shmangur larjen e shpeshtë, përdorni shampo të thatë për të thithur vajin dhe për të shtyrë ditën e larjes. Sigurohuni që kur përdorni shampo të largoni mbetjet e produktit nga skalpi.
Larja shkakton humbje flokësh?
Jo. Flokët që bien gjatë larjes janë ato që do të binin sërish natyrshëm. Shumë herë humbja e flokëve lidhet me stres ose ndryshime hormonale. Nëse keni humbje të vazhdueshme, konsultohuni me një dermatolog.
Këshilla për një larje profesionale:
- Shampoja aplikohet vetëm në rrënjë, jo në fundet e flokëve.
- Zbutësi aplikohet në fundet e flokëve. Një maskë e thelluar herë pas here ndihmon në hidratim.
- Nëse keni kruajtje, skuqje ose zbokth të vazhdueshëm, vizitoni dermatologun për të identifikuar një alergji ose gjendje të skalpit.
Në thelb, nuk ka një rregull të vetëm për të gjithë, por të kuptuarit e llojit të flokëve tuaj dhe nevojat e skalpit mund t’ju ndihmojnë të vendosni ritmin ideal të larjes.
