Një nga hyrjet më të veçanta të këtij edicioni të Big Brother vjen nga Stenaldo Mëhilli, i cili edhe pse ishte personi i parë që preku simbolikisht shtëpinë, tashmë bëhet zyrtarisht pjesë e lojës.
28-vjeçari nga Fieri jeton sot me nënën dhe vëllanë, në një familje që është ndërtuar mbi sfida të forta jetësore. Që në muajt e parë të jetës së tij, Stenaldo është përballur me një humbje të rëndë: vrasjen e të atit, ngjarje që ka ndryshuar përgjithmonë balancat familjare dhe ka vendosur nënën në qendër të çdo mbështetjeje emocionale dhe praktike.
Një tjetër goditje vjen shumë herët. Në moshën gjashtëmuajshe, si pasojë e një infeksioni të rëndë, ai humb shikimin. Megjithatë, kjo nuk është kthyer kurrë në justifikim apo pengesë për të ndalur ambiciet e tij.
Stenaldo ka zgjedhur të ecë përpara pa u vetëpërkufizuar si viktimë, duke kërkuar gjithmonë të vlerësohet për atë që bën dhe jo për rrethanat personale. Muzika ka qenë një nga rrugët e tij kryesore, çka e ka çuar edhe në skenën e “The Voice”, ndërsa një pasion tjetër i rëndësishëm ka qenë gazetaria.
Eksperienca në Top Albania Radio mbetet për të një nga kapitujt më të bukur të jetës profesionale, ndërsa më vonë zgjedh të largohet drejt Gjermanisë për të punuar dhe për të fituar më shumë pavarësi. Atje mëson të jetojë i vetëm, të orientohet në qytet, të gatuajë dhe të përballet me situata jo gjithmonë të lehta, përfshirë edhe momente rreziku.
Rikthimi në Shqipëri lidhet me vështirësitë e nënës së tij për t’u përshtatur me jetën jashtë vendit. Ndërkohë, ëndrra për të qenë pjesë e Big Brother ka qenë e pranishme prej vitesh, si një mundësi për një fillim të ri, si në planin personal ashtu edhe në atë profesional.
Stenaldo e bën të qartë se nuk kërkon trajtim të veçantë brenda shtëpisë dhe se hyn në lojë i bindur se ka mjaftueshëm forcë për të konkurruar si gjithë të tjerët. Ai nuk e sheh veten si zëdhënës të një komuniteti, por synon të jetë një shembull pozitiv përmes mënyrës së tij të jetesës dhe arritjeve, duke sfiduar paragjykimet me veprime dhe jo me fjalë.
Hyrja e tij ka emocionuar banorët dhe ka sjellë një nga historitë më njerëzore të këtij sezoni të Big Brother.
