Mbrëmjen e djeshme të parët që ndërtuan e krijuan punën në “Top Albania Radio” u mblodhën për një rast shumë special. Ervin Xhixhi, i njohur si Dj Vini, me rastin e 20 viteve punë në “Top Albania Radio” prezantoi për miqtë e kolegët e tij dokumentarin “Top Albania Radio-The Beginning”.
Në të u shfaq i gjithë rrugëtimi i radios së parë private kombëtare në vend, që solli revolucion jo vetëm në radiofoninë shqiptare. Ky dokumentar është i pari që i dedikohet “Top Albania Radio” dhe i gjithë ishte realizuar nga rrëfimet e 4 personazheve. Zamira Koleci që ka qenë kreyredaktore lajmesh në “Top Albania Radio”, Gerta Heta që ka qenë spikerja e parë e kësaj radio, Boiken Lako që ka qenë drejtor artistik dhe Saimir Kodra që ka realizuar “Radio Mania”, rrëfyen se si ka qenë puna në “TAR” dhe si e ndërtuan radion për ta sjellë deri në ditët e sotme në formën më të mirë. Ky aktivitet u organizua pranë ambienteve të COD në kryeministri dhe është cilësuar si dhurata më e bukur që Dj Vini mund t’i bënte “Top Albania Radios” në 20-vjetorin e krijimit. /revistawho.com
