Pirja e alkoolit shkakton të paktën shtatë lloje kanceri, sipas një studimi të ri.
Hulumtuesit kanë thënë se bile dhe njerëzit të cilët pinë pak alkool janë të rrezikuar nga sëmundja e kancerit – gjë që e hedh poshtë idenë se një gotë verë mund të jetë e mirë për ju, raporton Mail, përcjell Express.
Edhe pse mekanizimi i saktë nuk dihet, ekziston dëshmi e fortë se alkooli rrit rrezikun e zhvillimit të kësaj sëmundje, thonë ekspertët.
Alkooli shkakton kancerin e gojës dhe fytit, laringut, gurmazit, mëlçisë, zorrës së trashë, zorrës dhe gjoksit, por mund po ashtu të shkaktojë edhe forma tjera të tij.
Profesoresha Jennie Connor nga Departamenti për Parandalimin dhe Mjekësinë Sociale në Shkollën Mjekësorë “Otago” në Zelandë të Re, e ka bërë rishikimin e studimit duke i marrë parasysh studimet më të fundit.
Ajo tha se alkooli vlerësohet të ketë shkaktuar gjysmë milioni vdekje që nga viti 2012 – që përbën më shumë se një në 20, apo 5.8 për qind të të gjitha vdekjeve të kancerit.
