‘Love’ është projekti më i ri kinematografik, i cili duket se do të mbajë mbërthyer pas ekranit të gjithë artdashësit. Regjisori Dionis Papadhimitri ka vendosur të sjellë të tashmen në Tiranë, një temë e paprekur deri më tani nga kinemaja shqiptare. Me një gjuhë filmike krejt të vetën, ai prezanton me kurajo atë pjesë të reales për të cilën shumë bëjnë sikur nuk e shohin. Filmi merr përsipër të flasë për shpirtëroren, ku çdokush do të gjejë një pjesë nga vetja. Realizuesit e filmit kanë arritur të ndajnë me kujdes vlerat morale dhe shoqërore tek çdo personazh, në një kaos të qetë në sipërfaqe me shumë vuajtje në secilin prej tyre, siç shprehen dhe vetë ata.
‘Love’ është një film i ndërtuar në të tashmen, duke u futur me shumë kurajo në krizat dhe përjetimet e personazheve. Geri, personazhi protagonist, kthehet në Tiranë pas një kohe të gjate, i lodhur nga bashkëjetesa në kërkim të miqve të vjetër e mbase dhe dashurisë. Ndërthurur me episode komike, ai jo vetëm që nuk gjen asgjë nga ato çfarë ka lënë dikur, por një pjesë e miqve të tij janë në kriza edhe më të mëdha se vetë ai. Ky film sjell transformimin e shoqërisë, historitë e dashurisë, aventurat të cilat secili i ka përjetuar në formën e vetë.
Pavarësisht frustrimit të madh të shoqërisë, ‘Love’ i thotë pa bërtitur të gjithëve, se tashmë jemi të denjë për të bërë ndryshimin, por ne si shoqëri jemi të përgatitur. Në rolin kryesor, Genti Kame sjell me shumë ndjenjë një personazh te ri në karrierën e tij.
Pjesë e kastit të aktorëve janë disa nga emrat më të dashur të kinematografisë shqiptare si Olta Gixhari, Rozi Kostani, Gent Hazizi, Gentian Zenelaj, Luli Bitri, Herion Mustafaraj, Nevina Shtylla dhe Sara Kolami. Muzika e filmit është realizuar nga Bojken Lako dhe Janex, duke i dhënë një tjetër identitet ‘Love’. Me skenar të realizuar nga Irvin Mucaj, Dionis Papadhimitri, producent Klajd Papadhimitri, producent ekzekutiv Nevina Shtylla dhe Orjola Boni, kostumograf Ardi Asllani, drejtor fotografie Spartak Papadhimitri, ‘Love’ i fton të gjithë për ta parë nga afër këtë projekt sa të pëlqyer, aq dhe të komentuar nga të gjithë artdashësit e kinematografisë./revistawho.com
