Eliza Hoxha, këngëtarja e njohur nga Kosova është përfolur prej pak javësh për një mundësi angazhimi në radhët e politikës, por deri sot gjithçka kishte mbetur në kuadrin e thashethemeve. Ajo i mohoi fjalët dy javë më parë duke u shprehur se nëse do e marrë këtë vendim do e bëjë vetë publik. Siç duket sot është finalizuar gjithçka. Ka qenë kryetari i PDK-së (Partisë Demokratike të Kosovës) ai që ka bërë me dije lajmin krahas një fotoje me këngëtaren.
“Mirë se erdhe në PDK, Eliza. Profesionalizimi dhe dashuria jote për Prishtinën janë vlerë e madhe në Dekadën e Re, ndërsa PDK mbetet hapësira më e mirë për secilin që ka vizion, plan dhe dëshirë për ta ndryshuar vendin. Me ty dhe të tjerët, Dega e PDK-së në Prishtinë i jep Kryeqytetit atë që po i mungon prej kohësh: vullnetin për t’ia zgjidhur problemet”,-shkruan Kardri Veseli krahas postimit.
Ky do të jetë një hap tjetër në karrierën e Elizës, e cila më herët ka qenë pjesë e festivaleve më të rëndësishme shqiptare dhe ka qenë moderatore dhe autore e një programi televiziv dedikuar arkitekturës. /revistawho.com
