Koreografi i njohur Kledi Kadiu ka ndarë me shumë ndjenjë një nga periudhat më të vështira të jetës së tij, duke treguar se si një moment që zakonisht sjell festë dhe gëzim për çdo familje, për ta u kthye në një përjetim të dhimbshëm.
“U ndryshua gjithçka. Festa që çdo familje bën kur lind një fëmijë, për ne u shndërrua në një dhimbje të madhe. Fakti që ai ishte kaq i vogël… mospranimi i një prindi, pyetja e vazhdueshme ‘pse atij dhe jo mua’ është diçka që të shkatërron”, u shpreh Kadiu gjatë një interviste në emisionin “Mirëmbrëma Yje”.
Ai rrëfeu se ajo periudhë ishte e mbushur me ankth, lot dhe ndjenjën e pafuqisë përballë një realiteti të hidhur, por njëkohësisht edhe me forcën për të mos u dorëzuar.
“Ishte diçka që nuk e ndalon dot. Ajo kohë kaloi dhe, fatmirësisht, sot gjithçka po shkon më mirë për Gabrielin”, tha ai, duke theksuar se familja e tij jeton me shpresë dhe besim për të ardhmen.
Në rrëfimin e tij, Kledi ndau edhe disa detaje mbi gjendjen shëndetësore të djalit:
“Ai sot shkon në kopsht. Ka vështirësitë që kanë fëmijët me sfida të veçanta, por shpresa është e madhe. Ishte një virus që mori një drejtim të rëndë, duke prekur pjesë të caktuara të trurit. I ka ndikuar në të folur dhe në lëvizje”, u shpreh ai.
