E ftuara e episodit të fundit të emisionit “Goca dhe Gra” ishte Antonela Berisha, e cila ka qenë në qendër të vëmendjes gjatë muajve të fundit për shkak të incidentit të ndodhur në gusht të këtij viti. Në atë ngjarje, Antonela dhe motra e saj, Mariela Berisha, akuzohen për dhunimin e Klea Prengës.
Antonela foli për herë të parë publikisht rreth incidentit, duke shprehur keqardhjen e saj dhe dëshirën që situata të mos kishte ndodhur.
Gjatë intervistës, ajo ndau detaje të tjera për atë periudhë dhe mohoi pretendimet që qarkulluan në rrjet se ajo dhe motra e saj ishin larguar në Dubai pas incidentit.
“Kjo çështja e Dubait… dua ta sqaroj një herë e mirë. Do të doja të kishim qenë atje, por nuk kemi qenë. Është një informacion që mund të vërtetohet. Nuk mund të udhëtojë askush nëse është në verifikim. Nuk kemi qenë në Dubai. Impakti ka qenë pozitiv edhe pse lajmet vazhdonin.
Kam pasur shumë mesazhe në inbox, për persona që kanë pasur të njëjtën situatë si unë. Më i errëti si mesazh ka qenë për motrën time, për të cilën thonin se ishte e kërkuar për vrasje e mbetur në tentativë në Itali, atje ku ne kemi nënshtetësinë. Nuk e kemi kaluar ende këtë trysni, duke qenë se hetimi vazhdon, ne jemi nën masë.
Unë jam me detyrim paraqitjeje, ndërsa motra në arrest shtëpie. Ndryshe… do të doja të mos kishim qenë duke ngrënë darkë aty. Kam keqardhje për çdo gjë që ka ndodhur. Njerëz jemi, bëjmë gabime dhe normalisht nuk do të doja të ndodhte kjo që ka ndodhur”, tha Antonela Berisha.
Në lidhje me këtë deklaratë ka reaguar dhe vetë Klea Prenga, duke hedhur një “thumb” drejt Antonelës.
Ajo ka postuar një foto në Instagram ku shkruan: “Disa kërkojnë show, të tjerët thjesht lindin për t’u ulur në fron”.
