Në listën e pasaportave më të fuqishme në botë, kryesojnë tri pasaporta aziatike. Në raportin më të ri tremujor të publikuar nga firma këshilluese globale e qytetarisë dhe qëndrimit me qendër në Londër, Henley & Partners, btri pasaportat janë ajo e Japonisë, Singaporit dhe Koresë së Jugut.
Japonia u ofron qytetarëve të saj akses pa viza ose viza sipas kërkesës në një rekord prej 193 destinacionesh në të gjithë botën , krahasuar me 192 të dy të tjerëve, Singaporit dhe Koresë së Jugut.
Por për shkak të masave antikovid të Azisë, do të thotë se ata qytetarë kanë më pak mundësi që aktualisht ta përdorin atë liri udhëtimi, sesa njerëzit në Evropë apo në Amerikë.
Kërkesa ndërkombëtare e pasagjerëve për udhëtime ajrore në rajonin Azi-Paqësor është ende më pak se një e pesta e niveleve para pandemisë, sipas statistikave më të fundit nga Shoqata Ndërkombëtare e Transportit Ajror (IATA).
Dominon Evropa
Pranë tri vendeve të para qëndrojnë vendet evropiane. Gjermania dhe Spanja janë të lidhura në 190 destinacione, të ndjekura nga Finlanda, Italia dhe Luksemburgu me 189.
Pas tyre Austria, Danimarka, Holanda dhe Suedia, të gjitha në vendin e pestë, ndërsa Franca, Irlanda, Portugalia dhe Mbretëria e Bashkuar janë në vendin e gjashtë.
Zelanda e Re dhe Shtetet e Bashkuara shfaqen në vendin e shtatë, krahas Belgjikës, Norvegjisë dhe Zvicrës.
Afganët ulen sërish në fund të indeksit dhe mund të hyjnë në vetëm 27 vende, pa kërkuar vizë paraprakisht.
Për shkak të pushtimit të Ukrainës, mbajtësit e pasaportave ruse janë më të shkëputur nga pjesa tjetër e botës se kurrë më parë. Nëse po pyesni veten në çfarë vendi është Shqipëria, po e themi, është në vendin e 53-të.
Pasaportat më të mira për muajin korrik 2022 janë:
- Japoni (193 destinacione)
- Singapor, Koreja e Jugut (192 destinacione)
- Gjermani, Spanjë (190 destinacione)
- Finlandë, Itali, Luksemburg (189 destinacione)
- Austri, Danimarkë, Holandë, Suedi (188 destinacione)
- Francë, Irlandë, Portugali, Mbretëria e Bashkuar (187 destinacione)
- Belgjikë, Zelanda e Re, Norvegjia, Zvicra, Shtetet e Bashkuara (186 destinacione)
- Australi, Kanada, Republika Çeke, Greqi, Maltë (185 destinacione)
- Hungaria (183 destinacione)
- Lituani, Poloni, Sllovaki (182 destinacione)
Pasaportat më të këqija për muajin korrik 2022
- Koreja e Veriut (40 destinacione)
- Nepal, territori palestinez (38 destinacione)
- Somali (35 destinacione)
- Jemeni (34 destinacione)
- Pakistan (32 destinacione)
- Siri (30 destinacione)
- Irak (29 destinacione)
- Afganistan (27 destinacione)
