14 gushti shënjoi histori në muzikë. Të gjithë e prisnin, por u kapërcye çdo imagjinatë në nota madhështore dhe e shkruar bukur në çdo detaj. “Alpha show”, u shkrua me shkronja të mëdha në shpirtin e çdo njeriu që e do muzikën e mirë. Kur Noizy njoftoi se do të mbante një koncert gjigand, ishte pak por e sigurt se ashtu do të ishte. Muaj të tërë përgatitje, ditë për të ndërtuar skenën dhe disa orë për të lënë gjurmë. Teksa në hyrje të skenës merrje shiritin jeshil, çdo gjë tjetër ishte fantazi. Këngëtarët më të suksesshëm të momentit, skena që mes syve plot emocione të pjesëmarrësve dhe kurorës përballë tyre, dukej sikur të përqafonte në çdo moment dhe shumë adrenalinë. Në asnjë çast nuk mund të numëroje sa persona ishin të pranishëm, grupet u bënë shpejt turma dhe Tirana u “ndez”. Më shumë se 15 mijë bileta të shitura në koncertin, jehona e të cilit do të mbahet mend gjatë. Zemra që rrihnin fort, zëra që shkonin deri në limit, përballë të preferuarve të tyre, Ardian Bujupit, Xhensila Myrtezajt, Kidës, Ledri Vulës, Elgit Dodës, Ylli Limanit, Dhurata Dorës, Mc Kreshës e Lyrical Son, Loredanës Stresit, Varrosit, Ghali-t, Raf Camora-s, Krept & Konan-it etj. Noizy, dikur djali i vogël me ëndrra të mëdha, sot artisti i madh në koncert gjigand. Një interpretim “live” nën shoqërimin e bandës, për të rrëfyer me shpirt se kush ëndërron mundet, e kush mundet ia del. Ashtu si Noizy që ia doli të ngrinte Tiranën peshë. Po, “Alpha show” do të mbahet mend gjatë.
Noizy e tha, superkoncerti u bë, Tirana do ta mbajë mend gjatë!
