Të ftuarit VIP / Të shumtë kanë qenë të ftuarit VIP që nderuan me pjesëmarrjen e tyre në ceremoninë e zhvilluar me rastin e martesës së Saimir Tahirit. Paçka se ftesa e çiftit ka qenë për të gjithë, vetëm pak personalitete të selisë rozë nuk kanë mundur të jenë të pranishëm, për shkak të angazhimeve të shumta apo udhëtimeve jashtë vendit, si për shembull deputeti Ben Blushi, i cili ndodhet jashtë Shqipërie. Në kokteil kanë qenë të pranishëm figurat më të njohura të opozitës, duke përmendur këtu kreun e Partisë Socialiste njëherësh dhe kryetarin e Bashkisë së Tiranës, Edi Rama, kryetaren e Grupit Parlamentar socialist, Valentina Leskaj, Sekretarin Organizativ, Blendi Klosi me bashkëshorten e tij Nora, zëdhënësen e PS-së, Mimi Kodheli, kryetarin e Asamblesë së PS-së, Gramoz Ruçi. Po kështu të pranishëm kanë qenë deputetët Arta Dade, Ermelinda Meksi, Kastriot Islami, Taulant Balla me bashkëshorten e tij, Namik Dokle. Mes të ftuarve u vu re edhe e fejuara e kreut të G99, Erion Veliaj, Ajola Xoxa.
Kokteili
Është menduar të jetë ndryshe nga kokteilet e tjera që zhvillohen nëpër dasma. Shumë fin dhe elegant, aq sa kushdo që pati mundësinë ta shihte, ju duk diçka e rrallë dhe e përgatitur me shije. Çdo gjë iu besua “Geraldina Sposës”, e cila u kujdes edhe për arredimin e të gjithë ambientit. Ngjyrat që dominonin ishin e bardha dhe e gjelbra, në një kombinim të veçantë të përzgjedhur nga vetë nusja. Ajo që mbizotëronte nuk ishte muzika e fortë, që vendoset zakonisht në evenimente të tilla për të kërcyer e për t’u dëfryer, por për t’i qëndruar besnikë finesës, në sfond ka qenë një melodi e lehtë pianoje dhe violine, ndërsa të ftuarit gostiteshin me kokteile nga më të ndryshmet të përgatitura me mjeshtëri. Dhe duke qenë se origjina e dhëndrit është nga Tepelena, një vend të veçantë në lokal e zinin një grup popullor prej shtatë vetash, që interpretonin këngët polifonike.
E veçanta
Të gjithëve u ka bërë përshtypje makina e veçantë me të cilën u shoqërua nusja kur erdhi. Një ‘Benz’ limuzinë e viteve 1963, të cilën e kanë pasur shumë për zemër, qoftë dhëndri ashtu edhe nusja, e cila është mrekulluar në momentin që e ka parë. Sipas burimeve tona, makina të këtij lloji janë prodhuar rreth 2003 në total në të gjithë botën, dhe një e tillë ekziston edhe në Shqipëri, në këtë rast ekskluzivisht për dasmën e Saimir Tahirit.
Nusja
Imazhi i nuses ka qenë perfekt. Fustani në ngjyrë pana që mbante veshur i ka tërhequr vëmendjen të gjithë të ftuarve. I zgjedhur në koleksionin më të fundit të “Geraldina Sposës”, modeli i tij me gurë pati vërtet sukses. Modeli i flokëve ka qenë i mbledhur, dhe i tillë do të jetë edhe ditën e diel, kur të zhvillohet darka. Për sa i takon grimit, ky i fundit, ashtu sikurse dhe pritej, ka qenë tejet i lehtë dhe me sharm.
Dhëndri
Për veshjen e tij ka menduar “Firenze”. Një kostum shumë elegant në ngjyrë blu, dhe një kravatë po në blu, por i ndërthurur nga vijat. Një tjetër kostum, po kaq të veçantë, pritet të veshë dhe mbrëmjen e së dielës në ceremoninë e përbashkët me nusen.
E diela speciale
E shtuna është menduar nga çifti që të jetë ditë pushimi, për t’i lënë vendin të dielës, ditë në të cilën pritet një darkë po aq elegante sa edhe kokteili. Darka do të jetë vetëm për familjarët dhe miqtë më të ngushtë të çiftit, dhe ambienti ku do të organizohet është “Xibraku”, mjaft i preferuar ky nga çiftet VIP. Edhe këtu arredimi do të jetë perfekt, ku lulet natyrale do të jenë një tjetër detaj interesant./ gsh.al
