Efi Dhedhes ka zbuluar më shumë rreth projektit të saj më të fundit, filmit “Dashuri me këste”, gjatë një interviste në Andale media.
Në këtë komedi, Efi luan rolin e Marinelës, një vajzë që ajo e përshkruan si shumë të ngjashme me karakterin e saj, megjithatë me famë ndërkombëtare.
Përveç faktit që Efi u shpreh se zbuloi një talent të ri në aktrim që nuk e kishte njohur më parë, ajo gjithashtu ndau vështirësitë që ka hasur gjatë xhirimeve:
“Gjërat nuk janë ashtu siç duken. Ka probleme në staf, në xhirime, nuk kupton çfarë po bën, ishte hera e parë për mua. U sëmura shumë keq dhe nuk është se kisha zgjedhje që të rrija në shtëpi e të shërohesha.”
E pyetur nëse kishte pasur ndonjë shqetësim për skenarin e personazhit të saj, Efi u shpreh:
“Nuk jam njeri që bëj gjithçka që do më thonë, nuk bëhet fjalë. Kam kërkuar të shtoj më shumë batuta. Ndoshta regjisori nuk më njihte mirë dhe më kishte lënë pak si kukull. I thashë ‘më shtrembëro’, nuk ka problem.”
Megjithatë, Efi theksoi se nuk u ndje se kishte arritur të jepte maksimumin e asaj që shpresonte. Megjithatë, për këtë, do të jetë publiku që do të japë vlerësimin e tij, me publikimin e filmit më 20 shkurt.
