Lëvizja hippie, kishte nisur të përhapej gjerësisht, kur Monterey Pop Festival, nga 16 në 18 qershor të vitit 1967, prezantoi muzikën rok të kësaj subkulture për publikun e gjerë, duke nisur atë që u njoh si “Vera e dashurisë”. Të rinj të shkujdesur, vajza me lule në kokë, siç thuhej edhe në këngën “San Francisco” që dëgjohej gjithandej atë verë, veshur me fustane bohemiane…djem me flokë të gjatë e këmisha të zbërthyera, apo pa ato fare, që promovonin lirinë, dashurinë, paqen… Pati edhe probleme gjatë këtyre grumbullimeve dhe stili i tyre i jetës u kritikua, megjithatë kjo subkulturë është një nga pjesët më tërheqëse të hartës kulturore, ndërsa roku, një nga pasuritë muzikore prej kohësh. Edhe sot shumë njerëz gjejnë frymëzim në fotot e atyre viteve, dëgjojnë atë muzikë apo vishen me atë stil, ku me sa duket shpirti dhe trupi u rrinë më mirë. Dhe në pamje të parë, duket sikur edhe këngëtarja Venera Lumani, ka ndarë një foto të një çifti, thjesht për të kujtuar atë kohë që ajo e sjell vazhdimisht edhe me stilin e saj të veshjes. Por nuk është kështu, shkruan “Class”. Në foto, janë prindërit e saj, të cilëve Venera u uron 26-vjetorin e martesës. I ati, kitarist i grupit “Shekulli i Dreqit”, Menderes Lumani ka pamjen e një rrokeri, ndërsa e ëma të kujton vajzat hippie. Ata janë martuar në vitin 1990 kur rroku i vërtetë kishte ende muzikantët dhe ndjekësit e tij dhe kjo duket edhe në foto, e cila bashkë me rrokun të sjellë në mendje edhe koncertet e Amerikës. Vetëm që ata janë në Strugë dhe jo në Kaliforni. Megjithatë edhe në atë gusht kur ata janë martuar ka qenë një “Verë dashurie”, ashtu si një vit më vonë kur, në qershor, lindi e bija, Venera…që tani, e kuptuam, që burimin e frymëzimit për stilin e ka më të afërt.
