Prokurorët e kanë lidhur tenorin argjentinas, Platido Domingo, me një organizatë kriminale të shfrytëzimit seksual të grave dhe të miturve. Një javë më parë, policia ka bërë 50 bastisje në Shkollën e Jogës në Buenos Aires dhe ka arrestuar 19 persona.
Përveç kësaj, disa kanale televizive në Amerikën Latine po transmetojnë pjesë të regjistrimeve të përgjuara që përfshijnë zërin e një personi që autoritetet thonë se është Domingo, duke bërë plane me anëtarët e dyshuar të organizatës, megjithatë datat e këtyre regjistrimeve nuk janë bërë publike.
Në klipe, sipas NPR.org, burri dëgjohet duke folur me “Meddy”, një grua me të cilën ai dyshohet se po bën plane për të bërë seks. Burri detajon se si ai planifikon t’i shpëtojë vëmendjes së anëtarëve të stafit të tij në mënyrë që të mund ta takojë atë. Një tjetër fragment përfshin bisedën e “Meddy” me kreun e dyshuar të grupit, në të cilën ajo e informon atë se ka rregulluar të takojë burrin, të cilin ajo e quan si “Plácido. Që nga viti 2019 , më shumë se 20 gra kanë bërë akuza publike për sjellje të pahijshme ndaj tenorit. Si rezultat i këtyre akuzave, ai ndau rrugët me Metropolitan Opera në Nju Jork dhe dha dorëheqjen si menaxher i përgjithshëm i Operas LA në Kaliforni.
Karriera e Domingo jashtë vendit i ka mbijetuar akuzave për sjellje të pahijshme seksuale, ai është rishfaqur muajt e fundit për shfaqje në të gjithë Evropën, Amerikën Latine dhe Lindjen e Mesme.
Në një profil admirues të publikuar nga “Deutsche Welle” në janar të vitit 2021 që pasqyroi karrierën e tij të jashtëzakonshme, Domingo nuk pranoi t’i trajtonte akuzat dhe tha se ai preferonte t’i përkushtohej sfidave të tjera.
