Ka rrëfime që kur vijnë nga një figurë publike, tingëllojnë si një e vërtetë universale për shumë gra. Jo çdo shtatzëni të gjen “gati”, edhe kur jeta nga jashtë duket perfekte.
Në episodin e saj të radhës në YouTube, “Mirëmbrëma Yje”, gjatë një bisede me Lea Ypin, Arbana Osmani hapi një kapitull intim nga jeta e saj, duke treguar se shtatzënia e tretë erdhi rreth një vit pas lindjes së Diellit dhe nuk ishte e planifikuar.
Arbana kujtoi se në atë periudhë ishte në kulmin e angazhimeve profesionale dhe emocionalisht e lodhur, ndaj lajmi e tronditi:
“Mua më ka ardhur Zoi në jetën time… kur kam qenë në kulmin e punës dhe në kulmin e shumë ngjarjeve që më kishin lodhur emocionalisht… Dhe pastaj zbulova që isha shtatzënë… në atë kohë ishte një ‘shok’”, rrëfen ajo.
Madje, si shumë gra që e vendosin veten nën peshën e perfeksionit, pranoi se e gjykoi fort veten:
“E kam dënuar veten sepse u mërzita… Nuk isha gati për një fëmijë tjetër aq shpejt.”
Arbana ndalet edhe te dilemat reale që zakonisht mbeten jashtë kamerave:
“Bobo si do ja bëj me punën dhe me pasionet e mia… dhe me dy fëmijë të tjerë…?”
Por jeta, siç thotë vetë ajo, gjen mënyrën e saj për të të mësuar:
“Pastaj për çudi, u bëjnë të gjitha. Bëhen të gjitha punët pastaj.”
Një rrëfim i sinqertë, që e zbret “yllin” në tokë dhe e kthen në zërin e shumë nënave që s’e kanë luksin të jenë gjithmonë të forta. Por a është pikërisht kjo që e bën Arbanën edhe më të afërt me publikun? Dhe sa gra e kanë përjetuar “shokun” e një lajmi të madh, pikërisht kur mendonin se kishin më në fund kontrollin e jetës? 
