Bota e sporteve ajrore është zgjuar me një lajm që ka ngrirë zemrat. Pierre Wolnik, dy herë kampion bote në rënie të lirë, ka humbur jetën në një aksident tragjik në Alpe.
Sipas raportimeve nga mediat franceze dhe italiane, 37-vjeçari ishte hedhur nga një helikopter për një fluturim me kostum krahu mbi malin e Mont Blanc, një nga terrenet më sfiduese në Evropë për sportet ekstreme. Gjatë zbritjes, parashuta e tij nuk u hap siç ishte planifikuar, duke e kthyer një manovër të kontrolluar në një fatkeqësi fatale. Ai u rrëzua në zonën e Bessons, në Haute-Savoie.
Ekipetët e shpëtimit mbërritën menjëherë në vendngjarje, por pavarësisht reagimit të shpejtë, nuk ishte e mundur t’i jepej ndihmë. Autoritetet kanë nisur hetimet për të zbardhur plotësisht rrethanat e aksidentit.
Wolnik konsiderohej një nga figurat më të spikatura të parashutizmit francez. Me një karrierë të ndërtuar mbi disiplinë, precizion dhe guxim, ai kishte përfaqësuar Francën në arenën ndërkombëtare dhe po përgatitej intensivisht për Kampionatin Botëror 2026, një objektiv që, sipas miqve dhe bashkëpunëtorëve, e kishte vendosur si prioritet absolut.
Mesazhet e dhimbjes dhe respektit kanë vërshuar nga komuniteti global i sporteve ekstreme, pilotë, atletë, trajnerë dhe fansa që e njihnin jo vetëm për titujt, por për përulësinë dhe buzëqeshjen e tij karakteristike.
Në një sport ku çdo fluturim është një akt besimi mes njeriut dhe ajrit, Pierre Wolnik ishte simbol i ekuilibrit mes rrezikut dhe mjeshtërisë. Ai e kishte bërë qiellin shtëpinë e tij dhe pikërisht aty, në kufirin mes tokës dhe reve, u shkrua kapitulli i fundit i jetës së tij. Sot, Alpet duken më të heshtura. Dhe komuniteti i rënies së lirë, më i varfër.
