Ditët e sotme rrjetet sociale janë kthyer në një mënyrë promovimi për personazhet e njohur. Të kesh me miliona ndjekës në ‘Instagram’, ‘Twitter’ apo ‘Facebook’ do të thotë të jesh vërtet i suksesshëm dhe se ja ke arritur qëllimit për të fituar sa më shumë famë. Megjithatë jo gjithmonë shifrat tregojnë suksesin dhe nuk do të thotë se duhet të cilësohesh patjetër si një yll ‘Instagram-i’ falë miliona ndjekësve. Një rast i tillë është këngëtari i njohur, Capital T. Ai ka vetëm 800 mijë ndjekës në ‘Instagram-in’ e tij personal, por mund të themi se është ndër artistët më aktivë në këtë rrjet social.
Kur flasim për aktivitet nuk bëhet fjalë vetëm për promovimin e këngëve apo koncerteve, sepse Capital T ka arritur të gjejë forma të ndryshme për ta kthyer këtë rrjet social në një mënyrë komunikimi me fansat e tij. Nëse i hedh një sy të shpejtë, profili këngëtarit është i denjë si profil i një ‘bloggeri’, sepse gjen fotografi të shumta edhe nga përditshmëria e këngëtarit.
Për më tepër shumë herë postimet e tij përmbajnë doza humori, pse jo për të bërë të lumtur apo për të kënaqur sadopak ndjekësit. Madje videot që Capital publikon shpesh janë bërë virale dhe rasti më i fundit është ai i ‘Filma Challenge’, që është përhapur si një lloj sfide mes fansave të këngëtarit.
https://www.instagram.com/p/BsLs6b3jrIT/
Së fundmi ai ka krijuar edhe një llogari në ‘Youtube’ si ‘vlogger’ për t’u treguar të gjithë ndjekësve disa gjëra më shumë nga jeta e tij jashtë videoklipeve. Siç duket Capital T ka arritur të kuptojë peshën e vërtetë të rrjeteve sociale dhe shifrat nuk e kanë penguar në asnjë moment të jetë gjithmonë interaktiv me fansat e tij. /revistawho.com
