Mbrëmjen e djeshme Manjola Nallbani ishte e ftuara e radhës në emisionin “Këndo këngën time”. Përveçse u risollën në kujtesë disa nga hitet më të njohura të këngëtares, Manjola rrëfeu edhe shumë detaje në lidhje me karrierën dhe jetën e saj. Duke qenë se artistja është shfaqur gjithmonë shumë e kuruar në skenë nuk mund t’ju shpëtonte pyetjeve për imazhin e saj.
Manjola ka treguar se ajo i kushton shumë rëndësi pamjes së jashtme, pasi e vlerëson të bukurën jo vetëm tek vetja, por edhe tek të tjerët. “Unë jam nga ato qenie që edhe mos të kisha këtë profesion do e kisha shumë të rëndësishëm imazhin, është brenda shpirtit tim. Unë e dua të bukurën, jo thjesht ta ndërtoj në veten time por edhe kur e shikoj te të tjerët më ushqen shpirtin”, ka thënë Nallbani. Më pas ajo ka shtuar se nuk ka kryer asnjëherë ndërhyrje në fytyrë, sepse gjithmonë është kujdesur për ato çfarë i ka dhuruar natyra. “As nuk kam prishur ndërtesa pa leje dhe as kam ndërtuar gjëra nga fillimi. Përpiqem ta mbaj mirë atë që më ka dhënë perëndia, domthënë nuk kam transformuar asgjë në fytyrën time”, është shprehur Manjola. Pavarësisht se Nallbani ka 30 vite që është prezente në skenën shqiptare, asgjë nuk ka ndryshuar në portretin e saj dhe këngëtarja e ka ruajtur gjithmonë origjinalitetin edhe në stil. /revistawho.com
