Në një intervistë për “Live From Tirana” në Top Albania Radio, ish-banorja e “Big Brother VIP 3”, Ledjona Xheladinaj, ka ndarë përvojën e saj pas një aksidenti të rëndë që përjetoi kohë më parë.
Ajo tregoi se incidenti ndodhi në Dibër, ku duke përdorur një motor bore për të eksploruar terrenin e vështirë, pësoi një rënie që i shkaktoi dëmtime serioze në shtyllën kurrizore.
“Kam qenë në Dibër për xhirimet e emisionit tim dhe më pëlqen sfida e terreneve të vështira. Vendosa të përdorja motorin e borës vetë, por përfundova duke rënë dhe duke dëmtuar shtyllën kurrizore. Në atë moment mendova se u paralizova sepse nuk po ndjeja këmbët. Ishte një situatë shumë e rëndë, me borë dhe shi, dhe deshën 30 minuta që të mbërrija në spitalin e Peshkopisë. Pasojat ishin të vështira, më duhej regjim absolut për gjashtë javë për t’u rikuperuar. Prandaj dua t’u them të gjithëve që të jenë më të kujdesshëm,” rrëfeu ajo.
Ndër të tjera, Ledjona foli shkurtimisht edhe për jetën personale, duke ndarë disa detaje mbi marrëdhënien e saj romantike:
“Nuk kam asnjë hezitim ta them, jam shumë e lumtur. Personi që ka qenë pranë meje gjatë gjithë kësaj periudhe ka qenë ai i zemrës. Jam shumë mirënjohëse për mbështetjen e tij. Është e rrallë të gjesh njerëz të tillë sot,” tha ajo, duke ruajtur privatësinë mbi identitetin e tij.
