15 nëntori i 2018-ës ishte një ditë e shënuar për karrierën artistike të Anxhela Peristerit. Ajo arriti të bënte realitet ëndrrën e saj më të madhe, realizimin e një koncerti recital. Fansat e Anxhelës patën mundësinë të dëgjonin ‘live’ këngët më të bukura të dashurisë, që kanë emocionuar shqiptarët ndër vite. Megjithatë një pjesë e fansave mbetën të “zhgënjyer”, sepse numri i biletave ishte i kufizuar dhe nuk mundën të përjetonin nga afër emocionet e koncertit recital.
Gjithsesi kjo nuk do t’i mbetet peng askujt, sepse Anxhela ka menduar edhe për këtë pjesë. Këngëtarja ka publikuar në llogarinë e saj në ‘Youtube’ të gjithë koncertin recital që u mbajt në “Katedralen Ortodokse”, ku Anxhela këndoi një pjesë të mirë të repertorit të saj muzikor. Kjo nuk është e vetmja surprizë që artistja shqiptare ka rezervuar për dashamirësit e muzikës së saj. Shumë shpejt Anxhela do të nisë një tur koncertesh në të gjitha trevat shqipfolëse, Shqipëri, Kosovë dhe Maqedoni. Këngët e Anxhela Peristerit kanë arritur t’i rezistojnë kohës dhe nuk ka provë më të gjallë se sa këto suksese që këngëtarja ka shënuar ndër vite. /revistawho.com
