Në vitin 2013 revista prestigjoze “National Geographic” zgjodhi fotografinë e famshme të “Nuses Kosovare” si foton e ditës. Kjo fotografi u realizua me mjeshtëri nga Nita Zeqiri. Imazhi paraqet një traditë të vjetër mijëra vjeçare të Lubinjës së Zhupës së Prizrenit që është përcjellë brez pas brezi deri në ditët e sotme.
Fytyra e nuses pikturohet në shumë shtresa të bukura të ngjyrës që simbolizojnë gjëra të caktuara. Tre rrethet e arta që simbolizojnë ciklet e jetës. Rrethet e brendshme të kuqe janë simbole të pjellorisë dhe e gjithë fytyra është e mbuluar me pika të kuqe dhe të kaltra, që përçojnë dëshirën dhe urimin për nusen e re që të ketë familje të shëndetshme dhe të lumtur.
Tashmë kjo fotografi është filtri më i ri i Instagramit i cili u krijua nga agjensia Hallakate, që është agjensia e parë e mediave sociale në Kosovë.
