Historia e aktores Olta Gixhari me të dashurin 23-vjeçar Xhek Nasufi, u fol se mori fund në fillim të qershorit edhe pse ishte një lidhje e bukur dhe stabël. Për ndarjen nuk foli asnjëri nga çifti duke e kaluar në heshtje këtë histori, që u dokumentua në profilet e tyre zyrtare, me disa fotografi romantike. Por e ftuar në emisionin e Rudina Magjistarit për të folur rreth rolit të saj në shfaqjen “Opera për tre grosh”, Olta nuk i ka shpëtuar dot pyetjes për ndarjen nga i dashuri 23-vjeçar. Ndonëse hermetike sa i takon jetës private, pyetjeve të Rudinës 6 muaj pas ndarjes iu përgjigj në mënyrë ironike dhe duke aktruar paksa teksa u shpreh: “Nuk e mbaj mend lidhjen, kam probleme me memorien. Jam singëll. Nuk do doja të isha vetëm por jam vetëm. Asnjëherë nuk është mirë të jesh pa partner”, tha Olta. Nga ana e tij Xhek Nasufi, student i Ekonomikut në një universitet të njohur në Tiranë, jo vetëm që nuk e ka fshirë nga kujtesa por nuk ka fshirë as fotot me Oltën, shkruan sot suplementi “Panorama Plus”. Ai mban në profilin e tij zyrtar në Facebook ende fotografi me aktoren. Fotot janë shkrepur një vit më parë por për Xhekun s’ka ndryshuar asgjë, duke lënë përshtypjen tek miq e të afërm se janë ende bashkë. Djali simpatik nga Tirana nga stili i jetës që bën thuhet se vjen nga një familje shumë e pasur, pasi poston shpesh foto me makina të shtrenjta e argëtime të shumta.
