Detektivja private Shkenda Lili ka hedhur dritë mbi një prej temave që njerëzit e përmendin shumë, por flasin pak: tradhtinë. Me vite pune në terren, ajo ka parë histori që duken si skena filmi dhe situata që do t’i bënin shumë njerëz të dyfishonin vëmendjen ndaj partnerit.
Gjatë një interviste në “Live from Tirana”, Shkenda shpjegoi se si njerëzit mund të dallojnë kur diçka nuk shkon, dhe se si zakonisht sjelljet ndryshojnë para se të zbulohet e vërteta:
“Mendoj se gratë e kanë atë instinktin për ta kuptuar. Është ftohja mes çiftit, justifikimi i orëve të vona, justifikimi në darkë në krevat që janë të lodhur. Mbajtja e vetes shumë, në një moment të papritur. Telefoni në duar gjatë gjithë kohës, që e ka me password, që më përpara nuk e ka pasur. Janë shumë indicie që gruaja e kupton që diçka nuk shkon.”
Dhe nuk janë vetëm gratë ato që e dallojnë ndryshimin, thekson ajo. Edhe burrat vijnë me dyshime specifike:
“Të njëjtën gjë edhe burrat. Edhe ata e kanë aftësinë për ta kuptuar. Sidomos kur bashkëshortja e tyre nuk pranon të flejë me ta, diçka nuk shkon. Më vijnë shumë raste që thonë se kanë 1 apo 2 muaj që gruaja nuk pranon të flejë me ta, shkon në palestër, diçka ka…”
Shkenda tregon se shumë klientë tregojnë histori të gjata e personale, edhe kur ajo i pyet vetëm për objektivin:
“Ndonjëherë i them që nuk më duhen detajet, mjafton të më japin objektivin se kë do të ndjek edhe kaq. Por ata janë aq të mbushur nga brenda, sa u dukem edhe si psikologe dhe tregojnë gjithë historinë, edhe gjërat intime mundohen të m’i tregojnë.”
Po ora kur ndodh më shpesh tradhtia?
Pyetjes më të famshme, kur ndodh tradhtia më shpesh Shkenda i përgjigjet pa hezitim:
“Pasdite, gjatë orarit të punës. Personat që punojnë, mund të shkëputen gjatë orarit të punës dhe e kanë më të thjeshtë për justifikim.”
