Orinda Huta, e njohur prej vitesh si një prej prezantueseve më aktive në ekran, ka treguar se periudha pas rikthimit të saj si nënë i ndryshoi drejtimin profesional. Duke folur në “Opinion”, ajo rrëfeu se formati “Mam” nisi si një ide familjare, menjëherë pasi erdhi në jetë vajza e saj Atara, por sot është kthyer në një prej projekteve mediatike më të ndjekura nga prindërit.
Sipas saj, intensiteti i punës televizive nuk i linte hapësirë për jetën personale dhe për këtë arsye, vendimi për t’u zhvendosur drejt platformave digjitale erdhi natyrshëm. Podcast-i, që tashmë është në sezonin e tretë, ka sjellë jo vetëm qetësi më të madhe në ritmin e saj të përditshëm, por edhe rezultate që nuk i kishte imagjinuar.
Në bisedën me Blendi Fevziun, Orinda zbuloi se të ardhurat nga projektet online kanë kaluar pritshmëritë:
“Të ardhurat janë vërtet të mira dhe janë tek unë, të gjitha. Plus Instagrami ka të ardhurat e veta dhe kur bashkohen bëjnë një paketë shumë të fortë,” – sqaroi ajo, duke shtuar se pavarësia profesionale i ka dhënë më shumë liri në vendimmarrje.
Në fakt, ajo pranon se pikërisht kjo hapësirë e re është arsyeja pse formati është kaq personal dhe i sinqertë. Bisedat fokusohen në prindërimin, historitë e nënave, balancën dhe sfidat, duke bërë që publiku të gjejë veten tek ajo që dëgjon.
Biseda në studio
Blendi Fevziu: Financiarisht, a ia vlen?
Orinda Huta: Po, ia vlen. Financiarisht ia vlen.
Blendi Fevziu: Ia vlen më shumë se një rrogë në media tradicionale?
Orinda Huta: Po, po, po, absolutisht ia vlen më shumë sesa një rrogë në televizion…
Sipas saj, fakti që e ka të gjithë kohën në dorë dhe mund të menaxhojë projekte paralele është arsyeja përse sot ka një stabilitet më të madh, si profesionalisht ashtu edhe familjarisht.
Me sa duket, Orinda ka gjetur mënyrën për të bërë televizion në një formë krejt të re, jashtë televizionit.
