Orlando Bloom ka zgjedhur të flasë për herë të parë pas ndarjes së tij nga Katy Perry, duke treguar se pavarësisht gjithçkaje, mes tyre mbizotëron respekti dhe dashuria.
Çifti i famshëm nisi romancën në vitin 2016 dhe gjatë viteve kaluan momente të forta, ulje-ngritje, por edhe një fejesë madhështore në vitin 2019. Në gusht të vitit 2020, ata mirëpritën në jetë vajzën e tyre, Daisy Dove – bekimi më i madh i marrëdhënies së tyre.
Pas lajmit të ndarjes, aktori ka zgjedhur të japë një mesazh plot qetësi:
“Jam shumë mirë. Jam shumë mirënjohës. Kemi një vajzë të bukur. E dini, kur jep gjithçka nga vetja, siç bëra unë në këtë film, ndihem mirënjohës për çdo moment,” – tha Bloom.
Ndërkohë që promovon filmin e tij të ri, ai theksoi se raporti me Katy-n nuk ka marrë fund, por ka ndryshuar formë:
“Do të jemi mirë,” – u shpreh aktori, duke shtuar me bindje: “Ka vetëm dashuri.”
Nga ana tjetër, Katy Perry nuk ka bërë komente të drejtpërdrejta për fundin e fejesës, por paraqitjet e saj në skenë flasin vetë. E freskët dhe plot energji gjatë turneut veror, ajo ka treguar me humor dhe autoironi se di të përballojë kujtimet që fansat i sjellin për ish-partnerin e saj.
Burime pranë çiftit konfirmojnë se prioriteti i tyre ka qenë dhe mbetet vajza e vogël:
“Prioriteti i tyre ka qenë dhe do të jetë gjithmonë që Daisy të rritet me dashuri, stabilitet dhe respekt,” – thonë njerëz të afërt me ta.
Mesazhi që të dy duan të japin është i thjeshtë: edhe pse romanca nuk është më, dashuria për vajzën dhe kujdesi për familjen do t’i mbajë gjithmonë të lidhur.
