Pak orë para nisjes së “Big Brother VIP Albania 4”, Ledion Liço ka zbuluar disa detaje interesante që kanë shtuar emocionin tek publiku. Drejtuesi i spektaklit, i intervistuar për “Shqipëria Live”, ka treguar entuziazmin e tij për nisjen e sezonit të ri dhe ka dhënë disa informacione për formatin dhe shtëpinë e famshme.
Sipas tij, shtëpia ka pësuar disa ndryshime të rëndësishme, përfshirë arredimin dhe shtimin e banorëve jo VIP, të cilët do të jenë pjesë e këtij edicioni. Ai theksoi se, ndryshe nga edicionet e tjera, fokusi këtë herë do të jetë tek historitë personale të banorëve, më shumë sesa tek statusi i tyre.
“Atmosfera është njësoj si çdo fillim Big Brother-i. Duhet të jemi gati nesër për të filluar. Është bukur. Adrenalina e fundit të fillimit. Të gjithë janë shumë entuziastë për atë që do të nisë. Ka nisur një shi shumë i madh, që në besëtytnitë tona është një bereqet i madh.
Ka krevate dopio. Nuk dua t’ju tregoj shumë sepse Vëllai i Madh mërzitet pastaj. Ka 16 krevate në këto dy dhoma, por pjesa më e madhe do të jenë dopio.
Ky do të jetë një Big Brother që do të merret me personazhet publikë, por edhe me historitë e atyre që më pak njohim. Historia është ajo që ka më shumë rëndësi sesa reputacioni. Nesër do të merremi vetëm me VIP-at, por do të tregojmë më vonë dhe historitë që na kanë bërë përshtypje. Ata që nuk e kanë përemrin ‘VIP’ do të bëhen së shpejti pjesë e shtëpisë. Nuk janë pak, janë shumë,” tha Ledion Liço.
I pyetur për emrat e personazheve që përfliten si pjesë e edicionit, ai zbuloi se dy prej tyre do të hyjnë në shtëpi të shtunën në mbrëmje.
Sara Hoxha? Laert Vasili? Eros Grezda? Cubi Metka? Egli Tako? Kush prej tyre do të jetë pjesë e spektaklit?
“Të paktën dy prej tyre dhe futen që nesër,” tha Liço.
Një tjetër risi këtë sezon është bashkëpunimi mes Big Brother VIP Albania dhe Grande Fratello-s, që do të sjellë shkëmbimin e një banori mes Shqipërisë dhe Italisë.
“Po, e drejtë që pjesëtarë të stafit të BBVIP kanë shkuar në Grande Fratello dhe kanë folur me producentët e tyre. Qëllimi është që të bëjmë një Exchange, pra shkëmbim të një banori të Big Brother-it tonë, me një banor të Grande Fratello-s.
Kriteri i vetëm besoj se është kriteri gjuhësor. Të paktën të ketë një nivel të gjuhës për atë që shkon në Itali, që për ne shqiptarët është më e lehtë, sepse italishten e kemi gjuhë të dytë (qesh). Por edhe për atë që vjen këtu, duhet të di pak shqip. Edhe nëse s’di, do t’i bëjmë një kurs të shpejtë në avion,” tha ndër të tjera Ledion Liço.
Publiku tashmë pret me padurim të zbulojë se cilët do të jenë banorët që do të nisin këtë rrugëtim të gjatë dhe emocionues.
