Të nisësh një sipërmarrje është një hap i madh që kërkon më shumë se një ide të mirë. Pas çdo biznesi të suksesshëm qëndrojnë vendime të vështira, sakrifica dhe një kuptim i thellë i realitetit përtej atij entuziazmit fillestar për t’u quajtur biznesmene. Për të gjitha vajzat që po mendojnë të krijojnë sipërmarrjen e tyre, sipërmarrësja Sara Karaj vjen me 7 këshilla
thelbësore që duhet të dinë përpara se të ndërmarrin këtë rrugëtim.
1. Ideja nuk mjafton, duhet qëndrueshmëri
Një ide e mirë mund të të hapë derën, por nuk të mban brenda. Suksesi varet nga aftësia për të vazhduar edhe kur motivimi bie dhe vështirësitë rriten.
2. Do të të duhet të punosh më shumë se kurrë më parë
Sipërmarrja nuk është liri e menjëhershme është përgjegjësi e shumëfishtë. Orët e gjata, presioni dhe vendimet e vazhdueshme janë pjesë e përditshmërisë.
3. Pasiguria është normale
Nuk do të kesh kurrë garanci absolute. Tregu ndryshon, planet evoluojnë dhe ndonjëherë duhet të improvizosh. Aftësia për t’u përshtatur është një nga asetet më të mëdha që mund të kesh.
4. Jo të gjithë do të të kuptojnë
Shpesh njerëzit përreth nuk e shohin vizionin tënd. Mbështetja e kufizuar nuk duhet të të ndalojë, por të të forcojë bindjen në rrugën që ke zgjedhur.
5. Dështimi është pjesë e procesit
Gabimet nuk janë fundi, janë informacion. Çdo pengesë të mëson diçka që nuk mund ta mësosh nga teoria, por nga praktika në punën që do të nisësh.
6. Menaxhimi i parave është pjesë kritike
Edhe bizneset me ide brilante mund të dështojnë për shkak të menaxhimit të dobët financiar. Disiplina me shpenzimet është po aq e rëndësishme sa rritja, ndaj ki kujdes.
7. Duhet të besosh te vetja më shumë se te rezultati
Rezultatet vonojnë, por besimi duhet të jetë konstant. Sipërmarrja është maratonë, jo sprint, ndaj vazhdoje udhëtimin tënd.
Goca mos harroni:
Sipërmarrja nuk është vetëm për të pasur më shumë para, është një proces transformimin tuaj personal. Ajo të mëson disiplinë, durim dhe përgjegjësi në një nivel që pak eksperienca të tjera mund ta ofrojnë. Ndaj nëse keni një ide, vazhdojeni. Ju mundeni!
