Këngëtarja e njohur Parashqevi Simaku pritet të dalë nga spitali këtë të mërkurë, sipas njoftimit të biznesmenit Elton Ilirjani, i cili ka qenë pranë saj gjatë gjithë kësaj periudhe të vështirë. Simaku do të zhvendoset në shtëpinë e saj të re, ndërsa Ilirjani shprehet i emocionuar për këtë hap të rëndësishëm.
“Rrugëtimi i saj do të rinisë, do shkoj t’ia jap lajmin e mirë që ajo mezi po e pret. Do t’i çoj dhe byrek me spinaq, që ajo e ka shumë qejf. Kjo s’do të thotë se çdo gjë ka kaluar. Unë e di që kur ajo të dalë, do të vazhdojë me dëshirat e saj, me mënyrën si e shikon të gjithë këtë gjendje, por ne do të jemi aty për ta ndihmuar. Ky ka qenë një muaj me shumë dhimbje, me shpresë, me frikë, por po ia dalim,” u shpreh ai.
Megjithëse dalja nga spitali është një lajm i mirë, Ilirjani thekson se mbështetja për Simakun do të vazhdojë. Ai ka bërë thirrje për ndihmë nga gratë shqiptare që mund të ofrojnë kujdes dhe shoqëri për këngëtaren.
“I bëj thirrje të gjitha grave shqiptare, ato që kanë kohë të lirë, që të mund të na ndihmojnë gjatë akomodimit të Simakut në shtëpinë e saj të re. Apo për të qëndruar me të gjatë ditës dhe natës, për t’i qëndruar pranë. Do doja ta bëja unë këtë punë 24/7, por kushtet e mia nuk ma lejojnë. Nuk kam fjalë nga gjithë kjo eksperiencë, ka qenë shumë e bukur dhe shumë lodhëse,” tha ai.
Ilirjani gjithashtu u shpreh i zhgënjyer nga mungesa e mbështetjes financiare nga komuniteti artistik shqiptar, veçanërisht nga kolegët e brezit të Simakut.
Duke reflektuar mbi këtë periudhë të vështirë, ai zbuloi edhe një zakon të ri që ka marrë si pasojë e stresit. “Për ta çdramatizuar situatën, kërkoj dhe unë ndihmë, të lë cigaren që kam një javë që e kam nisur. E di që të dëmton shëndetin, lëkurën, karrierën time. E kam përjetuar shumë këtë situatë. Dalja nga spitali nuk do të thotë që ka kaluar problemi, do të thotë që puna fillon këtu.”
Për shkak të angazhimeve me Simakun, Ilirjani është detyruar të anulojë pjesëmarrjen në Javën e Modës në Kore. Megjithatë, ai shpreson që Parashqevi do të jetë e pranishme në rreshtin e parë kur ai të ngjitet në pasarelë në New York.
