Pesë vite pas martesës së tyre, Paris Hilton dhe Carter Reum kanë zgjedhur ta festojnë dashurinë me një ceremoni të dytë, intime dhe thellësisht simbolike. Në një skenë përrallore në Turks & Caicos, mes palmave dhe ujërave turkeze, çifti rinovoi betimet në prag të Shën Valentinit, vetëm pak ditë para ditëlindjes së yllit amerikan. Një moment që bashkoi romancën me familjen.
E veshur me një fustan të bardhë eterik, Paris u pa duke buzëqeshur ndërsa Carter u ul në gjunjë përpara saj, si një skenë filmi që rikrijonte emocionin e propozimit të parë. Por këtë herë, publiku ishte më i veçantë, fëmijët e tyre, Phoenix dhe London.
“Këtë herë nuk ishim vetëm burrë e grua. Ishim mami dhe babi. Phoenix dhe London duke parë dashurinë që i krijoi,” shkroi Paris Hilton, duke e kthyer ceremoninë në një dëshmi të rritjes së tyre si familje.
Ata rikofirmuan kështu, angazhimin e tyre në një ambient që dukej i shkëputur nga realiteti por me një mesazh shumë real, dashuria evoluon. Për Paris, e cila ka ndërtuar një karrierë mbi ikonografinë e glamurit, ky ishte një moment i qetë, i përqendruar tek thelbi. Një “Po” i dytë, jo si fillim i ri, por si konfirmim i një historie që vazhdon të shkruhet.
