Hapat e parë të karrierës Orinda Huta i hodhi në muzikë dhe publiku e njohu si këngëtarja me zërin e ëmbël dhe melodioz. “Tani të dua” ishte kënga e parë që e bëri të njohur dhe më pas Orinda vazhdoi të publikonte çdo vit e më shumë këngë. Por sot Huta i është dedikuar plotësisht televizionit dhe prej 5 vitesh nuk është aktive në muzikë. Së fundmi në një intervistë për “Mirage”, Orinda ka zbuluar se shumë shpejt do të rikthehet me këngë të reja.
Ajo ka treguar se kur shkonte në koncerte ndjente se nuk i përkiste atij vendi, ndaj vendosi që të shkëputej. Megjithatë ajo ka shtuar se nuk është bërë pishman për vendimin që ka marrë dhe nuk ndjehet aspak keq kur sheh kolegë të saj që kanë ecur shumë para në muzikë. Orinda ka treguar se për momentin është duke punuar me disa projekte njëkohësisht me dy nga kompozitorët e saj më të dashur, Aida Baraku dhe Armedn Rexhepagiq.
Ajo zbuloi se një këngë ishte gati, por bashkë me kompozitorët vendosi të mos e publikonte, për të bërë diçka tjetër më të përshtatshme për kohën dhe që do dëgjohet nga të gjithë. Orinda tha se njëkohësisht po punon me Pirro Çakon, por dashuria e madhe për televizionin nuk e lejon që t’i përkushtohet për shumë orë muzikës. Megjithatë duket se së shpejti Huta do të rikthehet me projekte të fuqishme dhe të gjithë po presim me padurim ta shikojmë sërish duke kënduar. /revistawho.com
