Familja Beckham ka zgjedhur Parisin për daljen e saj të parë publike pas bujës së fundit që përfshiu emrin e Brooklyn Beckham. Victoria dhe David u panë së bashku me fëmijët e tyre Romeo, Cruz dhe Harper, duke dhënë një imazh të qartë uniteti, pavarësisht spekulimeve që kanë qarkulluar në media ditët e fundit.
Në këtë dalje familjare nuk munguan as partneret e djemve: Kim Turnbull, e dashura e Romeo-s, dhe Jackie Apostel, partnerja e Cruz. Prania e tyre e përbashkët në rrugët e kryeqytetit francez u interpretua menjëherë si një sinjal i fortë se familja po përpiqet të lërë pas zhurmën dhe të fokusohet te angazhimet e veta.
Sipas raportimeve, arsyeja kryesore e udhëtimit në Paris lidhet me një moment të rëndësishëm për Victoria Beckham, e cila pritet të nderohet nga Qeveria Franceze me titullin “Knight of the National Order of Arts and Letters”, një vlerësim i rëndësishëm për kontributin e saj në modë dhe art.
Kjo paraqitje publike vjen vetëm pak ditë pasi Brooklyn Beckham publikoi një postim të gjatë që ringjalli diskutimet për tensione të brendshme në familje, të përfolura prej kohësh. Megjithatë, David dhe Victoria kanë zgjedhur të mos reagojnë drejtpërdrejt, duke shmangur deklaratat publike dhe duke lënë që veprimet të flasin për ta.
Dalja e përbashkët në Paris u komentua gjerësisht nga mediat ndërkombëtare, duke u parë si një përpjekje për të ruajtur imazhin e një familjeje të fortë dhe të bashkuar, pavarësisht sfidave apo mosmarrëveshjeve që mund të ekzistojnë larg syrit të publikut.
