Ish-banori i Big Brother, Klodian Mihaj, ka bërë një deklaratë që ka tërhequr vëmendjen e publikut gjatë emisionit “Post Big Brother”, duke pranuar për herë të parë se ka pasur një pëlqim për Elijona Binakajn.
Rrëfimi i tij erdhi si surprizë për shumë ndjekës të formatit, pasi gjatë qëndrimit në shtëpi ai ishte treguar më i rezervuar dhe nuk kishte shprehur hapur ndonjë ndjenjë ndaj saj. Klodiani shpjegoi se arsyeja pse zgjodhi të mos fliste më herët për këtë ndjenjë lidhej me faktin se jashtë shtëpisë kishte një lidhje dhe nuk dëshironte të perceptohej si tradhtar.
“E kam menduar se do të dilja si tradhtar nëse do të thosha se më pëlqen dikush. Nuk ka qenë e lehtë”, u shpreh ai gjatë intervistës.
Nga ana tjetër, edhe Elijona reagoi ndaj deklaratës së tij, duke theksuar se u ndje e lehtësuar që ai më në fund e pranoi publikisht atë që kishte ndjerë.
“Normal që u çlirova që më në fund e tha. Shumë shpesh i kam thënë se nuk është i sinqertë me veten, por nuk kam dashur t’ia imponoj me zor”, tha ajo.
Elijona shtoi se edhe ajo vetë kishte marrë një rrezik kur vendosi të shprehte hapur pëlqimin për të gjatë kohës që ndodheshin brenda shtëpisë së famshme.
“Edhe unë e kam marrë rrezikun kur i kam shprehur pëlqimin”, përfundoi ajo.
