Orlando Bloom ka treguar së fundmi se transformimi i tij për filmin “The Cut” e ka çuar trupin dhe mendjen në kufij të rrezikshëm. Aktori 48-vjeçar pranoi se për të interpretuar një boksier, i ishte dashur të humbiste 11 kilogramë me një regjim diete që ai e quan “torturë”.
Në një intervistë për This Morning, Bloom u shpreh se kishte kaluar javë të tëra duke ngrënë vetëm dy produkte:
“Papritmas ma morën të gjithë atë ushqim. Pastaj u detyrova të haja vetëm ton dhe kastraveca për tre javë”, rrëfeu ai.
Aktori shtoi se ky regjim ndikoi direkt në gjendjen e tij mendore:
“ Isha thjesht i rraskapitur, nuk kisha energji. Isha i uritur dhe isha një person i tmerrshëm”, tha Bloom, duke theksuar se kishte përjetuar paranojë dhe mendime të padëshiruara.
Për të arritur rezultatet, Bloom punoi me nutricionistin Philip Goglio, i cili i rekomandoi të ulte vakte nga tre në dy. Gjatë xhirimeve, aktori shtrihej mes skenave dhe më pas bënte pompa që të dukej më i formuar para kamerës. Megjithëse ia doli të mbante dietën ekstreme, ai pranoi se nuk do ta këshillonte askënd të ndiqte këtë metodë.
Në një rrëfim për People, ai kujtoi edhe pasojat e mungesës së gjumit:
“Rezulton se nuk mund të flesh kur je i uritur”, tha ai.
Filmi “The Cut”, ku Bloom luan rolin e një ish-boksieri që humbet gjithçka pas një ndeshjeje fatale, do të dalë në kinema më 5 shtator.
