Prokuroria Themelore në Gjilan ka nisur hetimet edhe ndaj modeles së njohur Arbenita Ismajli, krahas akuzave të mëparshme të ngritura ndaj ish-bashkëshortit të saj, reperit Fero. Mediat në Kosovë kanë zbuluar se me datë 13 qershor 2025, është lëshuar zyrtarisht dokumenti që konfirmon hapjen e hetimeve ndaj Ismajlit.
Modelja dyshohet për moszbatim të një vendimi të formës së prerë të Gjykatës, i cili i lejonte Feros të takonte vajzën e tyre të mitur. Në dokumentin e shpërndarë, thuhet:
“Se nga data 19.03.2025, në Gjilan, e pandehura Arbenita Shabani Ismajli, me dashje nuk i është bindur urdhrit apo vendimit të plotfuqishëm të Gjykatës, në Republikën e Kosovës, respektivisht aktvendimit mbi pajtimin gjyqësor, përmes procesverbalit me numër C.nr.3508/2024, të datës 12.06.2024 ashtu që, e pandehura pasi që është njoftuar lidhur me revokimin e autorizimit nga i dëmtuari ish bashkëshorti i saj Feronit Shabani, me të cilin autorizim, të pandehurës i është lejuar nga ana e të dëmtuarit, që fëmijën e tyre Nina Shabani ta marrë me vete jashtë Republikës së Kosovës, e pandehura edhe pse në dijeni lidhur me revokimin e autorizimit, asnjëherë nga momenti i revokimit me datë 19.03.2025, nuk i’a ka mundësuar kontaktin me fëmijën të dëmtuarit si baba biologjik, duke vepruar në kundërshtim me aktvendimin e formës së prerë, në të cilin është përcaktuar kontakti me fëmijën dy herë në muaj, vikendin e parë dhe të tretë përmes Qendrës për Punë Sociale në Gjilan”.
Rasti po ndjeket nga afër nga opinioni publik, sidomos pas deklaratave të shumta dhe përplasjes së vazhdueshme mediatike mes dy ish-partnerëve. Fero ka folur hapur për vështirësitë në kontaktin me vajzën e tij, ndërsa Arbenita është akuzuar më herët për mosrespektim të marrëveshjes gjyqësore.
