Prej javësh rrjeti ishte ndezur me thashetheme për “Big Brother Vip Albania 5”. Madje, u hodhën teori të çuditshme se Ledion Liço mund të mos ishte më moderatori i spektaklit, për shkak të një “krize martese” me producenten Sara Hoxha. Profile online, portale dhe fansa të reality show-t nisën një valë hamendësimesh që vetëm sa rritën më shumë misterin rreth sezonit të ri.
Por ja ku vjen e vërteta: çdo gjë paska qenë një mjegullnajë tymi! Ledioni rikthehet fuqishëm si prezantuesi i “BBVA 5”, i cili pritet të nisë në dhjetor. Konfirmimi? Promo-ja e publikuar nga Top Channel, ku Ledioni shfaqet në një ‘collaboration’ që i shuan të gjitha dilemat.
Sa për garuesit dhe surprizat nga shtëpia e re, ende asgjë s’është bërë publike—dhe kjo vetëm e shton kuriozitetin. Spektakli po afron, ndërsa publiku pret me padurim çdo detaj të ri.
Dhe për ta bërë lojën akoma më intriguese, vetëm pak ditë më parë, Sara publikoi një foto misterioze nga shtëpia e “BBVA 5”, duke e shoqëruar me pyetjen: “A jeni gati?”
Me pak fjalë: teoritë ishin të shumta, por moderatori mbetet po ai, Ledion Liço. Tani mbetet vetëm të numërojmë ditët drejt sezonit më të përfolur të “BBVA”.
